ޑިވެލޮޕްމަންޓް ބޭންކް އޮފް މޯލްޑިވްސްގެ ބޯޑަށް 3 މެންބަރަކު ޢައްޔަންކުރައްވައިފިއެވެ.
ރާއްޖެއިން ބޭރުގެ ފަންނީ ބޮޑެތި ބޭންކްތައް ހިންގުމުގައި ބައިވެރިވި 2 ބޭފުޅެއް މި ބޭންކްގެ ބޯޑަށް އައްޔަނުކޮށްފައިވާކަމަށް އިޤްތިޞާދީ ތަރައްޤީއާ ބެހޭ ވަޒީރު މުޙައްމަދު ސައީދު ވިދާޅުވެފައިވަނީ މި މަހުގެ 3 ވަނަ ދުވަހެވެ. މި ބޭންކް އޮޕަރޭޓް ކުރުމުގެ ލައިސެންސް ހޯދުމަށް ސަރުކާރުން އޭރު ހުށަހަޅުއްވާފައިވާކަމަށް ވެސް ސައީދު ވިދާޅުވެފައިވެއެވެ.
ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރާއްޖޭގައި ޑިވެލޮޕްމެންޓް ބޭންކެއް ޤާއިމްކުރުމަށް ނިންމަވައި، އުފައްދަވާފައިވަނީ މި އަހަރުގެ މޭ މަހުގެ 16 ވަނަ ދުވަހެވެ. މި ބޭންކްގެ ބޯޑަށް ޕީސީބީން އައްޔަނުކޮށްފައިވަނީ 1 ދިވެއްސެއްގެ އިތުރުން ރާއްޖެއިން ބޭރު 2 މީހެކެވެ.
ޑިވެލޮޕްމަންޓް ބޭންކު ބޯޑަށް އައްޔަންކުރެއްވި 3 މެންބަރުން:
- އަޙްމަދު ޢަލީ – މާލެ، ދިވެހިރާއްޖެ
- ރޮބަޓް ޑުނިއެލް ކާންޓް – އިނގިރޭސިވިލާތް
- ސައީދު އަބްދުއްނާސިރު ބިން ސައީދު ހަސަން އަލް ޖުނެއިދު – ސިންގަޕޫރ
ޑިވެލޮޕްމަންޓް ބޭންކެއް މުހިންމުވާކަމަށް ސަރުކާރުން ހާމަކޮށްފައިވާ ސަބަބުތައް:
- ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫޢުތަކަށް ފައިސާ ހޯދުމުގައި އެހީއެއްގެ ގޮތުގައި ބޭނުން ކުރުން
- ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރު ކުރުން
- ދެމެހެއްޓެނިވި އިޤްތިޞާދީ ތަރައްޤީއަށް އިންވެސްޓުކުރުން
- ދެމެހެއްޓެނިވި އިޖުތިމާޢީ ތަރައްޤީއަށް އިންވެސްޓުކުރުން
- ޢުމްރާނީ ތަރައްޤީއަށް ބޭނުންވާ ފައިސާ ހޯދުން
ބޭންކު އުފައްދަން ބޭނުންވާ ކުންފުނި ރެޖިސްޓަރކޮށް ނިމިފައިވާކަމަށް އިޤްތިޞާދީ ތަރައްޤީއާއި ބެހޭ ވުޒާރާއިން ވިދާޅުވެއެވެ.
