މޫނު ބުރުގާ އަޅާއިގެން އުޅޭ ފަރާތަކަށް ވަޒީފާ ނުލިބޭ ގޮތަށް އެއްވެސް ޤަވާއިދެއް އަދި އުސޫލެއް އޮތް ނަމަ އެ އުސޫލެއް އުވާލުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު އަންގަވައިފިއެވެ.
ދ. ހުޅުދެލީ މެޖިސްޓްރޭޓް ކޯޓުގެ ވަޒީފާއަކަށް ކުރިމަތިލީ އަންހެނަކު މޫނު ބުރުގާ އަޅާތީ އޭނާ އަށް ވަޒީފާ ނުދިން މައްސަލައާ ގުޅިގެން ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ، އިސްލާމް ދީނާ ހިލާފުނުވާ ގޮތަށް ހެދުން އަޅާނަމަ ވަޒީފާ ދިނުމުގައި އެއްވެސް ތަފާތެއް ކޮށްގެން ނުވާނެ ކަމަށެވެ.
އެގޮތުން އެފަދަ ތަފާތުކުރުން ގެނުވާ ގޮތަށް ކުރީގައި ހަދާ އަދިވެސް އަމަަލުކުރަމުންދާ ހުރިހާ ގަވާއިދުތަކާއި އުސޫލުތައް ބަދަލުކުރަން ޖެހޭކަމަށް ވިދަޅުވެ ރައީސް ވަނީ އެކަން ކުރުމަށް ކަމާބެހޭ ފަރާތްތަކަށް މިހާރު އަންގައިފައިވާނެ ކަމަށެވެ.
https://x.com/MMuizzu/status/1826481015709466768
މީގެ އިތުރުން ރައީސް ވަނީ، މި މުޖުތަމައު އަކީ ހުރިހާ މާނައެއްގައި އަދުލުވެރިކަމާއި އިންސާފުވެރިކަން އިސްކުރާ މުޖުތަމައަކަށް ހަދަން އެންމެން އަޒުމް ކަނޑައެޅުމަށް އިލްތިމާސް ކުރައްވައިފައެވެ.
ދ ހުޅުދެލީގައި މޫނު އެޅި އަންހެނަކަށް ވަޒީފާ ނުދިނުމަށް ނިންމި ނިންމުމާއި ގުޅިގެން ދިވެހި އަންހެން މީހާ އަށް ވަޒީފާ ނުދޭން ނިންމި ކަމަށް ބުނާ އީމެއިލް މީސް މީޑިއާގައި މިހާރު ވަނީ އާންމުވެފައެވެ.
