މޫސުން ގޯސްވެ، މެދުކެނޑުމެއް ނެތި ވާރޭ ވެހުމާ ގުޅިގެން ބަންގްލަދޭޝްގެ ބައެއް ސަރަޙައްދުތަކުގައި ފެންބޮޑުވެ ގިނަބަޔަކު ހާލުގައިޖެހިއްޖެއެވެ.
އެ ޤައުމުގެ ކާރިސާތަކާ ބެހޭ އިދާރާއިން ހާމަކޮށްފައިވާ ގޮތުގައި މި ހާދިސާގައި ރޭގެ ނިޔަލަށް ދެ މީހަކު މަރުވެފައިވެއެވެ. އަދި ފެންބޮޑުވުމާ ގުޅިގެން ހާލުގައިޖެހުނު މީހުންގެ އަދަދު 3 މިލިޔަނަށް ވުރެ ގިނަވާނެކަމަށް ވެސް އެ އިދާރާއިން ބުނެފައިވެއެވެ. މީގެ އިތުރުން ބޯކޮށް ވާރޭވެހުނު ސަރަހައްދުތަކުގައި ޢާންމުންގެ ގެދޮރާއި ޢުމްރަނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވާކަމަށް އެ ގައުމުން ހާމަކޮށްފައިވެއެވެ.
ބަންގްލަދޭޝްގެ ފްލަޑް ފޯކާސްޓިންގް އެންޑް ވާނިންގް ސެންޓަރ (އެފްއެފްޑަބްލިޔުސީ)ން ވަނީ މިއަދުގެ އިރުއޮއްސުމާ ހަމައަށް ވެސް އެ ޤައުމުގެ ބޮޑު ސަރަޙައްދަކަށް ބޯކޮށް ވާރޭވެހޭނެކަމަށް ލަފާކޮށްފައެވެ.
މި ހާދިސާގައި އެންމެ ބޮޑު ގެއްލުމެއް ލިބިފައިވާ ސަރަހައްދުތައް:
- ފޭނީ
- މޯލޯބީބާޖާރު
- ހޯބީގޮންޖް
- ކުމިއްލާ
- ޗޮއްޓޮގްރާމް
ފެންބޮޑުވުމާ ގުޅިގެން އެ ސަރަޙައްދުތަކުން ދެމޭ ކޯރުތަކުގެ ފެންގަނޑު ބަންޑުންވެ، ގިނަ މަގުތަކެއްގައި ވަނީ ފެންބޮޑުވެފައެވެ. އެހެންކަމުން ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އެ ގައުމުގެ ސަލާމަތީ ބާރުތަކަށް ވަނީ ބޮޑެތި ގޮންޖެހުންތަކާ ކުރިމަތިލާން ޖެހިފައެވެ. ނަމަވެސް ފެންބޮޑުވެފައިވާ ސަރަޙައްދުތަކުގައި ދިރިއުޅޭ ރައްޔިތުން ދަނީ ރައްކާތެރި ހިސާބުތަކަށް ދަތުރު ކުރަން މަސައްކަތް ކުރަމުންނެވެ.
އިންޑިޔާގެ ދާޚިލީ ވަޒީރު، އަމިތު ޝާހް ވިދާޅުވީ މި ހާދިސާގައި ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމުގެ ގޮތުން ކާރިސާތަކާ ބެހޭ އިދާރާގެ ޓީމުތައް މިހާރު ވަނީ ހަރަޖާތްތެރިވާން ފަށައިފައިކަމަށެވެ. ހަމައެހެންމެ ފެންބޮޑުވެފައިވާ ސަރަޙައްދުތަކަށް ބޯޓުތަކާއި ހެލިކޮޕްޓަރުތައް ފޮނުވާފައިވާކަމަށް ވެސް އަމިތު ޝާހް ވިދާޅުވިއެވެ.
