ނޭޕާލުން ދަތުރު ކުރި އިންޑިޔާގެ ބަހެއް ކޯރަކަށް ވެއްޓި ގިނަ ޢަދަދެއްގެ ބަޔަކު މަރުވެއްޖެއެވެ.
ނޭޕާލުގެ ތަނަހޫން ޑިސްޓްރިކްޓުގެ މަރްސިޔަންގްދީ ނަމަކަށް ކިޔާ ކޯރަށް އިންޑިއާގެ ފަސިންޖަރުން އުފުލާ މި ބަސް ވެއްޓިފައި ވަނީ އިންޑިޔާގެ އުއްތަރު ޕްރަދޭޝުން ނޭޕާލުގެ ކަތަމަންޑޫއަށް ދަތުރުކުރަމުންދިޔަ މަގުމަތީގައެވެ.
“ޔޫޕީ އެފްޓީ 7623 ނަންބަރު ޖަހާފައިވާ ބަސް ކޯރަށް ވެއްޓި، މިހާރު އޮތީ ކޯރުގެ އައްސޭރިފަށުގައި” ކަމަށް ތަނަހުން ޑިސްޓްރިކްޓް ފުލުސް އޮފީހުގެ ޑީއެސްޕީ ދީޕްކުމާރް ރާޔާ ވަނީ އެ ގައުމުގެ މީޑިއާތަކަށް ކަށަވަރުކޮށްދީފައެވެ.
އޭއެންއައި ނިއުސް އޭޖެންސީގެ ރިޕޯޓުގައިވާ ގޮތުން، މި ބަސް ދަތުރު ކުރީ ޖުމްލަ 40 ފަތުރުވެރިން ގޮވައިގެންނެވެ. އޭއެންއައި ނިއުސްއިން ރިޕޯޓުކޮށްފައިވާ ގޮތުގައި މި ހާދިސާގައި 14 މީހަކު މަރުވެފައިވާކަން މިހާރު ވަނީ ކަށަވަރުކުރެވިފައެވެ. އެ ސަރަހައްދުން 14 ހަށިގަނޑު ނަގާފައިވާކަމަށް އެ ގައުމުގެ އާރމްޑް ޕޮލިސް ފޯސްގެ ތަރުޖަމާނު ކުމާރް ނިއުޕާނޭ ވެސް ވިދާޅުވެފައިވެއެވެ. އަދި 16 މީހަކު ޒަޚަމްވެފައިވާކަމަށް ވެސް މައުލޫމާތު ލިބެއެވެ.
މި ހާދިސާ ހިނގީ އައިނާ ޕަހްރާގެ އަންވުކައިރޭނީ ސަރަހައްދުގައި ގާތްގަނޑަކަށް މެންދުރު 11:00 ހާއިރެވެ.
