މިއަހަރުގެ މިހާތަނަށް ޗައިނާ މާކެޓުން ޖުމުލަ 189470 ފަތުރުވެރިން ޒިޔާރަތްކޮށްފިއެވެ.
ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި އޯގަސްޓު މަހުގެ 21 ގެ ނިޔަލަށް ޖުމްލަ 189470 ޗައިނާގެ ފަތުރުވެރިން ވަނީ ރާއްޖެއަށް ޒިޔާރަރްކޮށްފައެވެ. ދިވެހިރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ލިސްޓުގެ އެއްވަނައިގައި ޗައިނާ އޮތް އިރު މިއީ 65 އިންސައްތައިގެ އިތުރުވުމެކެވެ.
ހުސްވި އަހަރު ނިމުނު އިރު، ޗައިނާ އޮތީ ތިންވަނައަށް އެންމެ ގިނައިން ފަތުރުވެރިން އައިސްފައިވާ ގައުމުގެ ގޮތުގަ އެވެ. މިދިޔަ އަހަރު ޗައިނާއިން 187118 ފަތުރުވެރިން ވަނީ ރާއްޖެއަށް ޒިޔާރަތްކޮށްފަ އެވެ.
މީގެއިތުރުން، މި މަހުގެ 21 ވަނަ ދުވަހުގެ ނިޔަލަށް ޖުމްލަ 1،309،400 ޓޫރިސްޓުން ރާއްޖެ ޒިޔާރަތް ކޮށްފައިވާ ކަމަށް ވެސް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ. މިއީ ދުވާލެއްގެ މައްޗަށް އެވްރެކޮށް 5620 ފަތުރުވެރިންނެވެ.
ސަރުކާރުގެ އަމާޒަކީ މިއަހަރުގެ ތެރޭގައި ރާއްޖެއަށް 2 މިލިއަން ފަތުރުވެރިން ގެނައުން ކަމަށާއި މިހާރު ރާއްޖެއަށް ފަތުރުވެރިން އަންނަމުންދާ އަދަދުތަކަށް ބަލާއިރު، އަހަރު ނިމޭއިރު 2.1 މިލިއަން ނޫނީ 2.2 މިލިއަން ފަތުރުވެރިން ރާއްޖެއަށް އަންނާނެ ކަމަށް ލަފާކުރެވޭ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވަނީ މީގެކުރިން ވިދާޅުވެފަ އެވެ.
