މިހާތަނަށް ދުނިޔެއިން ފެނުނު ދެވަނައަށް އެންމެ ބޮޑު ޑައިމަންޑް އެފްރިކާގެ ޤައުމެއްކަމަށްވާ ބޮޓްސްވާނާއިން ފެނިއްޖެއެވެ.
2492 ކެރެޓްގެ މި ޑައިމަންޑް ފެނުނީ ބޮޓްސްވާނާގެ ވެރިރަށް ގާބޮރޯންގެ އުތުރުން އޮންނަ ކަރޯވޭ ނަމަކަށް ކިޔާ މައިނަކުންނެވެ. މިއީ ކެނެޑާގެ ލުކާރާ ޑައިމަންޑް ނަމަކަށްކިޔާ ކުންފުންޏަކުން ހިންގާ މައިނެކެވެ.
ލުކާރާއިން ބުދަ ދުވަހު ބުނެފައިވަނީ މި ޖަވާހިރު ހޯދިފައިވަނީ ބޮޓްސްވާނާގެ އުތުރު އިރުމަތީގައިވާ ކަރޯވޭ ޑައިމަންޑް މައިންއިން އެކްސްރޭ ޓެކްނޮލޮޖީ ބޭނުންކޮށްގެންކަމަށެވެ. މައިނިންގ ކުންފުނިން މި ޑައިމަންޑްގެ އަގެއް ހާމަކޮށްފައެއް ނުވެއެވެ.
“މި އެކްސްޓްރާއޯޑިނަރީ 2،492 ކެރެޓްގެ ޑައިމަންޑް ލިބުމާ ގުޅިގެން އަޅުގަނޑުމެން ވަރަށް އުފާވެފައި މިތިބީ،” ލުކާރާގެ ޕްރެޒިޑެންޓް އަދި ސީއީއޯ ވިލިއަމް ލޭމް ބަޔާނެއްގައި ވިދާޅުވެފައިވެއެވެ.
“މި ހޯދުމަކީ އަޅުގަނޑުމެންގެ ކަރޯވޭ މައިންގެ އެކްސްޓްރާއޯޑިނަރީ ޤާބިލުކަން ދައްކުވައިދޭ ކަމެއްގެ އިތުރުން، އަޅުގަނޑުމެން [އެކްސްރޭ ޓްރާންސްމިޝަން] ޓެކްނޮލޮޖީގެ އެންމެ އާ ވައްތަރުތަކަށް ކުރި އިސްޓްރެޓީޖިކް އިންވެސްޓްމަންޓް ހިފަހައްޓައިދޭ ކަމެކެވެ،” ވިލިއަމް އިތުރަށް ވިދާޅުވެފައިވެއެވެ.
ބުރާސްފަތި ދުވަހު ގެޓީ އިމޭޖަސްގައި ޝާއިޢުކުރެވުނު ފޮޓޯތަކުން ދައްކައިދެނީ ބޮޓްސްވާނާގެ ރައީސް މޮކްގްވީޓްސީ މަސީސީ ވެރިކަންކުރާ ރަށް، ގަބޮރޯނޭގައި ހުންނަ އޭނާގެ އޮފީހުގައި މި 2،492 ކެރެޓްގެ ޑައިމަންޑް ގެންގުޅުއްވާ މަންޒަރެވެ.
ބޮޓްސްވާނާއަކީ ދުނިޔޭގެ އެންމެ ބޮޑެތި ޑައިމަންޑް އުފައްދާ ޤައުމުތަކުގެ ތެރެއިން ޤައުމެކެވެ. ގްލޯބަލްޑޭޓާގެ މަޢުލޫމާތު ދައްކާގޮތުން، މިދިޔަ އަހަރު ދުނިޔޭގެ ޑައިމަންޑް އުފެއްދުމުގެ 20 އިންސައްތަ ހިއްސާކުރަނީ ބޮޓްސްވާނާއިންނެވެ.
ލުކާރާގެ އެންމެ ކާމިޔާބު ހޯދުންތަކުގެ ތެރޭގައި 2019 ވަނަ އަހަރު އެ ކުންފުނިން ހޯދި 1،758 ކެރެޓްގެ ސެވެލޯ ޑައިމަންޑާއި 2015 ވަނަ އަހަރު ހޯދި 1،109 ކެރެޓްގެ ލެސެދީ ލަ ރޯނާ ޑައިމަންޑް ހިމެނެއެވެ.
