ބެންކް އޮފް މޯލްޑިވްސްގެ ރުފިޔާ ކާޑަށް ޑޮލަރު ދިނުން ހުއްޓާލަން ބީއެމްއެލްގެ ބޯޑުން ނިންމައިފިއެވެ.
ރާއްޖޭގެ އޮންލައިން ނޫހެއް ކަމަށްވާ “ސަން އޮންލައިން” އިން ކަށަވަރުކޮށް ރިޕޯޓް ކޮށްފައިވާ ގޮތުގައި ބީއެމްއެލް ބޯޑުން ވަނީ ރުފިޔާ ކާޑަށް ދޫކުރަމުން އައި ޑޮލަރު ދޫނުކުރަން ނިންމާފައެވެ.
ސަން އިން މިފަދައިން ރިޕޯޓްކޮށްފައިވާ އިރު، ބީއެމްއެލް އިން އަދި މިކަން ރަސްމީކޮށް އިއުލާން ކޮށްފައެއް ނުވެއެވެ. މިއާއިއެކު މިނިންމުން ތަންފީޒު ކުރާނެ ސީދާ ތާރީހެއް އަދި ސާފުވެފައެއް ނުވެއެވެ.
ބީއެމްއެލްގެ ޑެބިޓް އަދި ކްރެޑިކް ކާޑުން ރާއްޖެއިން މިހާރު 250 ޑޮލަރާއި ހަމައަށް ރާއްޖެއިން ބޭރުގެ މުއާމަލާތްތައް ކުރެވޭއިރު، ބޭރުގައި ދިރިއުޅޭ ދިވެހިންނަށް މަހެއްގެ މައްޗަށް 750 ޑޮލަރު ބޭނުން ކުރެވެ އެވެ.
ބީއެމްއެލް އިން ޑޮލަރު ލިމިޓެއް ކަނޑައަޅާފައި ވަނީ ކޮވިޑުގެ ދުވަސްވަރު ދިމާވި އިގުތިސާދީ ދަތިތަކާއި ގުޅިގެން ޑޮލަރު ލިބުން ދަތިވުމުގެ ސަބަބުންނެވެ. އަދި ހަތަރު އަހަރުވެފައިވީ އިރުވެސް ބީއެމްއެލްއިން އެއަދަދު ބޮޑު ކޮށްފައެއް ނުވެއެވެ. މިއަށްފަހު ރައީސް ޑރ. މުޢިއްޒު ވެރިކަމަށް ވަޑައިގެންނެވީ ޑޮލަރު ލިމިޓު އުވައިލާނެ ކަމަށް ވައުދު ވެގެންނެވެ. އަދި މިދިޔަ ފެބްރުއަރީ މަހުގެ އެކަކުން ފެށިގެން ބޭރުގައި ކިޔަވާ ދަރިވަރުންނަށް ޑޮލަރު ނެގޭ މިންވަރު 750 ޑޮލަރުން 1200 ޑޮލަރަށް އިތުރުކުރާނެ ކަމަށް، ސަރުކާރުން ޖެނުއަރީ މަހު އިއުލާންކޮށްފައިވީ ނަމަވެސް އެބަދަލު ގެނެވިފައެއް ނުވެއެވެ.
