ބީއެމްއެލްގެ ޑެޕިއުޓީ ސީއީއޯގެ އައިޝަތު ނޫރައްދީން އެ ބޭންކުގެ ބޯޑު މެންބަރު ކަމުން ވަކިކޮށްފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ވަނީ މިކަން އަންގަ ހުސްވި ހަފްތާގެ ބުރާސްފަތި ދުވަހު އައިޝަތު ނޫރައްދީން އަށް ސިޓީއެއް ފޮނުވާފައެވެ.
އައިޝަތު ނޫރައްދީން ވަނީ ބީއެމްއެލްއަށް 42 އަހަރު ހިދުމަތް ކުރައްވާފައެވެ.
ޕީސީބީ އިން މިދިޔަ ޖެނުއަރީ މަހު ބީއެމްއެލްގެ ފަސް ޑިރެކްޓަރަކު މަގާމުން ވަކިކޮށްފައިވާއިރު އެގޮތަށް އަމަލު ކުރެވިދާނެ ކަމާއި މެދު ސުވާލު އުފެއްދުމުން ޕީސީބީ އިން ވަނީ އެނިންމުން ބާޠިލުކޮށްފައެވެ. އެއަށްފަހު އެ ފަސް ބޭފުޅުން މަގާމުން ވަކިކޮށްފައިވަނީ ހިއްސާދާރުންގެ އާންމު ޖަލްސާއަކުންނެވެ.
ބީއެމްއެލްގެ ޗާޓަރުގައި ބަޔާންކޮށްފައިވާ ގޮތުގައި އެބޭންކަކީ އާންމު ރައްޔިތުންގެ ވެސް ހިއްސާވާ ކުންފުންޏެއް ކަމުން އެބޭންކުގެ ބޯޑުގެ ޑިރެކްޓަރުން ވަކި ކުރެވޭނީ ހިއްސާދާރުންގެ އާންމު ޖަލްސާއަކުންނެވެ.
