ޕަބްލިކް ސާވިސް މީޑިއާ (ޕީއެސްއެމް)ގެ އައު މެނޭޖިން ޑިރެކްޓަރަކަށް މުޙައްމަދު ސައީދު އައްޔަނުކުރައްވައިފިއެވެ.
ކުރިން އެ މަގާމު ފުރުއްވި ޒީނާ ޒާހިރު އިއްޔެ ވަނީ މަގާމުން އިސްތިއުފާ ދެއްވާފައެވެ. މި ކަމާ ގުޅިގެން ޕްރައިވެޓައިޒޭޝަން ބޯޑުން ނެރުއްވި ބަޔާނުގައި ވިދާޅުވީ މުޙައްމަދު ސަޢީދު އައްޔަނުކުރައްވާފައިވަނީ މެނޭޖިން ޑިރެކްޓަރ އަދި ޑިރެކްޓަރުންގެ ބޯޑުގެ މެންބަރުކަމުގެ މަޤާމަށްކަމަށެވެ.
މުޙައްމަދު ސަޢީދު ވަނީ 1989 ވަނަ އަހަރުން ފެށިގެން ސަރުކާރުގެ އެކި މަޤާމްތައް ފުރުއްވާފައެވެ. އެގޮތުން މީޑިއާ އޮފިސަރެއްގެ މަޤާމުން ފެށިގެން ތަޢުލީމީ ދާއިރާގެ އެކިއެކި މަޤާމުތައް ފުރުއްވާފައިވާކަން ފާހަގަކޮށްލެވެއެވެ. މީގެ އިތުރުން ސަރުކާރުގެ މުހިންމު އެކިއެކި ކޮމިޓީތަކާއި އާސަންދަ ކުންފުނީގެ ބޯޑު މެންބަރުކަން ވެސް ސައީދު ވަނީ ކުރައްވައިފައެވެ.
މުޙައްމަދު ސައީދަކީ މީގެ ކުރިން އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީގެ މަގާމު ވެސް ފުރުއްވި ބޭފުޅެކެވެ. އެހެންނަމަވެސް ޖަނަވަރީ 2019 އިން ފެށިގެން އެ އަހަރުގެ އޭޕްރީލް މަހާ ހަމައަށް ސައީދު ހުންނެވީ އެ މަގާމުން ސަސްޕެންޑު ކުރައްވާފައެވެ. ސައީދު ޕާމަނަންޓް ސެކްރެޓަރީގެ މަގާމުން ވަކިކުރެއްވީ 2019 ވަނަ އަހަރުގެ އޭޕްރީލް މަހެވެ.
