މަސްތުވާތަކެއްޗާއި ދެކޮޅަށް ފުލުހުން ހިންގަމުން އަންނަ އޮޕަރޭޝަންގެ ދަށުން މަސްތުވާތަކެއްޗާއެކު ދެ މީހަކު ހައްޔަރުކޮށްފިއެވެ.
އެގޮތުން މަސްތުވާތަކެތި ގެންގުޅޭކަމަށް ލިބުނު މަޢުލޫމާތަކާއި ގުޅިގެން ލ. އިސްދޫގައި ފުލުހުން ހިންގި އޮޕަރޭޝަނެއްގެ ތެރެއިން ލ މާބައިދޫ މާފޮޅޭގޭ އުމުރުން 28 އަހަރުގެ މުހައްމަދު އަފްރާޒް ނަމަކަށް ކިޔާ މީހަކު ހައްޔަރުކޮށްފައިވާކަމަށް ފުލުހުން ވިދާޅުވެއެވެ. އަދި އޭނާގެ އަތުން އަތުލައިގެން މަސްތުވާތަކެތީގެ ވަގުތީ ބަރުދަނުގައި 236.3 ގްރާމް ހުރި ކަމުގައިވެސް ފުލުހުން ވަނީ ވިދާޅުވެފައެވެ.
އަދި އޭނބާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާ 15 ދުވަހަށް ބަންދުކުރުމަށް ކޯޓުން އަމުރުކޮށްފައިވާކަމަށް ފުލުހުން ވިދާޅުވިއެވެ.
ފުލުހުން ހައްޔަރުކުރި ދެވަނަ މީހަކީ މަސްތުވާތަކެތި ގެންގުޅޭކަމަށް ލިބުނު ރިޕޯޓަކާއި ގުޅިގެން ގއ. ވިލިނގިލީގައި ހިންގި އޮޕަރޭޝަނުގައި ހައްޔަރުކުރި އ. ވިލިނގިލި، ފުނަމާގެ، އުމުރުން 34 އަހަރުގެ އަޙްމަދު ރިޝާހެވެ.
ފުލުހުން ވިދާޅުވީ އޭނާ ހައްޔަރުކޮށްފައިވަނީ މަގުމަތިން ހުށްޓުވައި ބަލައި ފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއްހުރި ދެ ރަބަރު ޕެކެޓު ފެނިގެން ކަމަށެވެ.
އެގޮތުން ރިޝާހްވެސް 1 ދުވަހަށް ބަންދުކުރުމަށް ކޯޓުން އަމުރުކޮށްފައިވާކަމަށް ފުލުހުން ވިދާޅުވިއެވެ.
މީގެ އިތުރުން ގއ ވިލިނގިލީގައި މި މަހުގެ 23 ވަނަ ދުވަހު ހިންގި އޮޕަރޭޝަނުގައި، އެ ރަށު ފަޅު ގެއެއް ބަލައިފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި ފިލްމުހުސްކުރި ދަޅެއް ފެނިފައިވާ ކަމަށާއި އެ މައްސަލައާ ގުޅިގެން އަދި މީހަކު ހައްޔަރުކޮށްފައެއް ނުވާ ކަމަށްވެސް ފުލުހުން ވިދާޅުވެފައިވެއެވެ.
