ކަރަންޓް އުޅަނދުތަކަށް ބޭނުންވާ ހަކަތަ ޗާޖްކުރުމަށް ޚާއްސަ ސްޓޭޝަނެއް ގާއިމްކުރުމަށް ސްޓެލްކޯއިން ނިންމައިފިއެވެ.
މިކަން ހާމަކޮށް އެ ކުންފުނީގެ މެނޭޖިންގ ޑިރެކްޓަރު ހުސައިން ފަހްމީ އެކްސްގައި ކުރެއްވި ޕޯސްޓެއްގައި ވިދާޅުވީ، މި ސްޓޭޝަން ގާއިމްކުރުމަށްޓަކައި ކުރަން ޖެހޭ މަޝްވަރާތައް މާލޭސިޓީ ކައުންސިލާއި ކުރެވިފައިވާކަމަށާއި، އެކަމުގައި ކައުންސިލްގެ ފުރިހަމަ އެއްބާރުލުން ލިބިގެންދާނެ ކަމުގެ ޔަގީންކަން ސިޓީ ކައުންސިލުން އަރުވައިފައިވާކަމަށް ފަހުމީ ވިދާޅުވިއެވެ.
އެގޮތުން މި ސްޓޭޝަނަކީ، ރައީސުލްޖުމްހޫރިއްޔާ ރައީސް މުއިއްޒު ގެންގުޅުއްވާ ތިމާވެށީގެ ހަރުދަނާ ސިޔާސަތުގެ ތެރެއިން ކާބަން ފުޓްޕްރިންޓް ކުޑަކުރުމަށާއި، ގައުމަށާއި ދުނިޔެއަށް އަންނަ ކުރިއެރުންތަކާއިއެކު، ތިމާވެއްޓާއި ރައްޓެހި އުޅަނދުތަކަށް އޮންނަ ޑިމާންޑްބޮޑުވެ، އެފަދަ އުޅަނދުތައް ގެންގުޅެން ބޭނުންވާ ފަރާތްތަކަށާއި، އަދި މިހާރުވެސް ގެންގުޅޭ ފަރާތްތަކަށް ލުއި ފަސޭހަތައް ހޯދައިދިނުމުގެ ގޮތުން ގާއިމްކުރާ ސްޓޭޝަނެއްކަން ފާހަގަކުރައްވައި ފަހުމީ ވިދާޅުވިއެވެ.
މި ސްޓޭޝަން ގާއިމްކުރުމަށް ހަމަޖެހިފައިވަނީ، އެ ކުންފުނީގެ ހެޑް އޮފީހާއި އިންވެގެން އޮންނަ ދޮންއަދަރާދަ މަގުގައިކަމަށްވެސް ފަހުމީ ވަނީ ވިދާޅުވެފައެވެ.
މީގެ އިތުރުން އަވަސް މުސްތަޤްބަލެއްގައި ހަތަރުފުރޮޅުލީ އުޅަނދުގެ އިތުރުން ދެ ފޮރުޅުލީ އުޅަނދުތައް ވެސް ޗާޖްކުރެވޭ ގޮތަށް މި ސްޓޭޝަން ތައްޔާރުކޮށް ތަނުގެ ޚިދުމަތް ލިބެން ފަށާނެކަމުގައި ފަހުމީ ވިދާޅުވިއެވެ.
