ދިވެހިރާއްޖޭގައި ބިދޭސީންގެ މައްސަލަ ހައްލުކޮށް ޤަވާއިދާއި ޚިލާފަށް އުޅޭ ބިދޭސީން އަތުލައިގަތުމުގެ ގޮތުން އިމިގްރޭޝަނާއި ފުލުހުން ގުޅިގެން ހިންގަމުންދާ އޮޕަރޭޝަންގެ ދަށުން އަނެއްކާވެސް އިތުރު 4 ތަނެއް ބަލައި ފާސްކޮށް ޤަވާއިދާއި ޚިލާފަށް އުޅޭ 6 ބިދޭސީއަކު އިމިގްރޭޝަނުން ހައްޔަރުކޮށްފިއެވެ.
އިމިގްރޭޝަނުން ވިދާޅުވީ ޤަވާއިދާއި ޚިލާފަށް ބިދޭސީންތަކެއް މަސައްކަތް ކުރަމުންދާކަމަށް އިމިގްރޭޝަން ވޮޗަށް ލިބުނު މައުލޫމާތަކާއި ގުޅިގެން އޯގަސްޓް މަހުގެ 21 ވަނަ ދުވަހު މާލޭގެ 3 ތަނަކާއި ހުޅުމާލޭގެ ތަނެއް ބަލައި ފާސްކޮށްފައިވާކަމަށެވެ.
https://x.com/ImmigrationMV/status/1827653067657166928
އަދި މި އޮޕަރޭޝަންގެ ތެރެއިން ބިދޭސީ 5 ފިރިހެނަކާއި އެއް އަންހެނަކު އިމިގްރޭޝަންގެ ބެލުމުގެ ދަށަށް ގެނެވިފައިވާކަމަށްވެސް އެ އިދާރާއިން ވަނީ ވިދާޅުވެފައެވެ.
ޤަވާއިދާއި ޚިލާފަށް ރާއްޖެ އެތެރެވެ ވިޔަފާރީއާއި އަދިވެސް އެހެނިހެން ތަފާތު މަސައްކަތް ކުރަމުންދާ ބިދޭސީންގެ މައްސަލަ ބޮޑުވެ އިމިގްރޭޝަނުން ފަށައިފައިވާ އޮޕަރޭޝަންގެ ދަށުން ފާއިތުވި މަހު އެކަނިވެސް ވަނީ ކަންބޮޑުވާންޖެހޭ މިންވަރަށް ދަށު ދަރަޖައިގައި ކާބޯތަކެތި އުފައްދައި ވިއްކަމުންދާ ބިދޭސީންގެ ބޮޑެތި މައްސަލަތަކެއް ފެންމަތިވެ އެ ފަރާތްތައް ހައްޔަރުކޮށްފައެވެ.
