ޔަމަނުގެ އައްސޭރިފަށުން ދަތުރުކުރަމުންދިޔަ މުހާޖިރުން އުފުލާ އުޅަނދެއް ފެތި، 25އަށް ވުރެ ގިނަ މީހުން ކަނޑުވެއްޖެކަމަށް އދ. ގެ މުހާޖިރުންނާބެހޭ އޭޖެންސީން ބުނެފިއެވެ.
އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް)އިން ނެރުނު ބަޔާނެއްގައި ބުނެފައިވާ ގޮތުގައި، އެ އުޅަނދު ދަތުރުކުރީ 25 އިތިޔޯޕިއާ މުހާޖިރުންނާއެކުގައެވެ. އޭގެ އިތުރުން އެ އުޅަނދުގައި ތިބީ އެ އުޅަނދުގެ ކެޕްޓަނާއި އިތުރު 1 އެހީތެރިޔެކެވެ.
އައިއޯއެމުން ހާމަކުރި ގޮތުގައި އެ އުޅަނދު ފެތުނީ މިދިޔަ އަންގާރަ ދުވަހު ތައިޒް ޕްރޮވިންސްގެ ކައިރިއަށެވެ. އޭގެ ފަހުން ކަމާ ގުޅޭ އިދާރާތަކުން ހޯދިހޯދުމުން އަދަނު ކަނޑާއި ރެޑްސީ ގުޅުވައިދޭ ބާބުލް މަންދަބު ހަނިކަނޑުގެ އައްސޭރިފަށުން 11 ފިރިހެނުންނާއި 2 އަންހެނުންގެ ހަށިގަނޑު ފެނިފައިވާ އިރު، ޔަމަނަށް ނިސްބަތްވާ 2 މީހަކާއި ދެން ތިބި 12 މީހުން ވަނީ ގެއްލިފައެވެ.
ޔަމަނަކީ އިރުމަތީ އެފްރިކާގެ މުހާޖިރުން މުއްސަނދި ގަލްފު ގައުމުތަކަށް ވަޒީފާ އަދާކުރުމަށް ދަތުރުކުރުމަށް ބޭނުންކުރާ މައިގަނޑު މަގެކެވެ.
ވޭތުވެދިޔަ ދިހަ އަހަރުގެ ތެރޭގައި، މަދުވެގެން 2،082 މުހާޖިރުން މި މަގުގައި ގެއްލިފައިވާކަމަށް އައިއޯއެމުން ބުނެފައިވެއެވެ. މީގެ ތެރެއިން 693 މީހުން ވަނީ ފެނުގައި ޣަރަޤުވެފައެވެ. މީގެ އިތުރުން ނިމުނު ޖޫން މަހު، ޔަމަނުގެ ދެކުނު އައްސޭރިފަށުގައި އުޅަނދެއް ޣަރަޤުވުމުގެ ސަބަބުން މަދުވެގެން 49 މުހާޖިރުން މަރުވެފައިވާކަމަށާއި އަދި 140 މީހުން ގެއްލިފައިވާކަމަށް އައިއޯއެމުން ބުނެފައިވެއެވެ.
