ޑޮލަރުން އާމްދަނީ ލިބޭ ކުންފުނިތަކުން ޕެންޝަނާއި ކޯޕަރޭޓް އިންކަމް ޓެކުސް، ޑޮލަރުން ދައްކާ ގޮތަށް ގާނޫނު ބަދަލު ކުރަން ސަރުކާރުން ނިންމާފައިވާ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.
މިއަދު ނޫސްވެރިންނާއި ބައްދަލުކުރައްވާ ވާހަކަދައްކަވަމުން އުޝާމް ވިދާޅުވީ ރާއްޖެއަށް ދިމާވެފައި އޮތް ޑޮލަރުގެ ދަތިކަން ހައްލު ކުރުމަށް ބައެއް ގާނޫނުތަކަށް ބަދަލު ގެންނަން ނިންމާފައިވާ ކަމަށެވެ.
ރާއްޖޭގެ އިގްތިސާދަށް ދިމާވެފައިވާ ދަތިތަކުން އަރައިގަތުމަށް ސަރުކާރުން ވަރަށް ބުރަކޮށް މަސައްކަތްތަކެއް ކުރަމުން ގެންދާ ކަން ފާހަގަ ކުރައްވާ އުޝާމް ވިދާޅުވީ ކުރިއަށް އޮތް ދެތިން ހަފްތާގެ ތެރޭގައި ބައެއް ގާނޫނުތަކަށް އިސްލާހު ގެނެސް، ޑޮލަރުގެ ދަތިކަމަށް ހައްލެއް ހޯދުމަށް އިތުރު މަސައްކަތްތަކެއް ކުރުމަށް ހަމަޖެހިފައިވާ ކަމަށެވެ.
އެގޮތުން ޕެންޝަނާ ބެހޭ ގާނޫނަށާއި، އިންކަމް ޓެކްސްގެ ގާނޫނަށް ބައެއް އިސްލާހުތައް ގެނައުމަށް ހަމަޖެހިފައިވާ ކަމަށް އުޝާމް ވިދާޅުވިއެވެ. މީގެއިތުރުން އުޝާމް ވިދާޅުވީ މީރާ އަށް ލިބޭ އާމްދަނީ މިހާރަށް ވުރެ ބޮޑަށް އިތުރުކޮށް މީރާގެ ގަވައިދުތަކަށް ނޫނީ ގާނޫނަށް ގެންނަން ޖެހޭ ބަދަލުތައް ގެންނަން ޖެހޭ ނަމަ އެކަން ކުރުމަށް ނިންމާފައިވާ ކަމަށެވެ.
އުޝާމް އިތުރަށް ވިދާޅުވީ މި ވަގުތުން ވަގުތަށް ގެންނަން ނިންމި ބަދަލާއެކު ޑޮލަރުން މުސާރަދޭ ކުންފުނި ތަކުން ޕެންޝަނާއި ކޯޕަރޭޓް އިންކަމް ޓެކްސް ވެސް ޑޮލަރުން ދައްކާ ގޮތަށް ގާނޫނު އިސްލާހު ކުރަން ނިންމާފައިވާ ކަމަށެވެ.
އުޝާމް އިތުރަށް ވިދާޅުވީ ޑޮލަރުން މުސާރަ ދޭ ބައެއް ކުންފުނިތަކުން ރުފިޔާއިން ފެންޝަނަށް ފައިސާ ދައްކާއިރު، ދައުލަތަށް ދައްކަން ޖެހޭ ފައިސާ ރުފިޔާއިން ދެއްކުމަށް ކަޅު ބާޒާރުގައި ޑޮލަރު މާރުކުރާ ޝަކުވާތައް ލިބޭތީ ކަމަށެވެ.
