މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ)އިން ޕްރޮގްރާމް އެކްރެޑިޓޭޝަން ގަވާއިދުގެ ދަށުން އެވިޑް ކޮލެޖާއި ދެކޮޅަށް އެޅި ފިޔަވަޅުތައް އެ އޮތޯރިޓީން އުވާލައިފިއެވެ.

އެމްކިއުއޭއިން ކުރި އިއުލާނެއްގައި ވާގޮތުން އެވިޑް ކޮލެޖުން ޚިލާފުވިކަމަށް އެމްކިއުއޭއިން ކަނޑައަޅައިފައިވާކަންކަން މިހާރު ރަނގަޅުކޮށްފައިވާކަމަސް އެ އޮތޯރިޓީއަށް ފެންނާތީ، އެވިޑް ކޮލެޖަށް އަޅާފައިވާ ވަގުތީ ފިޔަވަޅުތައް އުވާލާފައިވާ ކަމަށެވެ.

އެގޮތުން އެ އިއުލާނުގައި ވާގޮތުން އެ އޮތޯރިޓީން އެވިޑް ކޮލެޖާއި ދެކޮޅަށް އަޅައިފައިވާ ފިޔަވަޅުތަކާއި ގުޅިގެން އެމްކިއުއޭއާއި އެވިޑް ކޮލެޖާއިއެކު މި މަހުގެ 18 ވަނަ ދުވަހު މަޝްވަރާ ބައްދަލުވުމެއް ބޭއްވުމަށްފަހު އެމްކިއުއޭއިން ފާހަގަކޮށްފައިވާ ކަންކަން މުރާޖަޢާ ކުރުމަށް އެ އޮތޯރިޓީން  އެވިޑް ކޮލެޖަށް ޒިޔާރަތްކޮށްފައިވާ ކަމަށެވެ.

އެވިޑް ކޮލެޖަށް އެމްކިއުއޭއިން އެޅި ފިޔަވަޅުތައް

• 1- ރާއްޖޭގެ ގައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުން؛
• 2- އިތުރު ޕްރޮގްރާމަކަށް އެކްރެޑިޓޭޝަނާއި ހިންގުމުގެ ހުއްދަ ދޫނުކުރުން؛
• 3- އެ ޕްރޮގްރާމެއް ހިންގަނީ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑާ އެއްގޮތަށް ނޫންކަމާއި، ޕްރޮގްރާމް އެކްރެޑިޓޭޝަންގެ މިންގަނޑުތަކާ ހިލާފަށްކަން އާންމުކޮށް އިއުލާނުކުރުން؛

އެމްކިއުއޭއިން އެވިޑަށް ފިޔަވަޅު އެޅީ އެ ކޮލެޖްގައި ހިންގަމުން އަންނަ ގިނަ ޕްރޮގްރާމްތަކެއްގެ ޝަކުވާ ލިބުމާއި ގުޅިގެން ބެލި ބެލުމުން، ލެކްޗަރާރުންނަށް މުސާރަ ނުދިނުމާއި ދަރިވަރުންގެ އިމްތިޚާން ކަރުދާސްތައް ބައެއް ލެކްޗަރަރއިން މާރކް ނުކުރުމުގެ އިތުރުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުން އިތުރަށް ފައިސާ ދައްކަން ޖެހުން ފަދަ މައްސަލަތަކެއް ފާހަގަކުރެވުމާއި ގުޅުގެންނެވެ.