ޑިވެލޮޕްމަންޓް ބޭންކު އޮފް ދަ މޯލްޑިވްސް ލިމިޓެޑްގެ ޗެއާމަން އަދި ސީއޯއޯގެ މަގާމަށް އައްޔަން ކުރެއްވި ބޭރުގެ ތަޖުރިބާކާރުންނާއި ރައީސް ޑރ. މުޢިއްޒު ބައްދަލު ކުރައްވައިފި އެވެ.
ރާއްޖޭގައި އުފައްދާ ޑިވެލޮޕްމެންޓް ބޭންކުގެ ޗެއާޕާސަން އަރުނީ ގުންޓެލީކް އަދި ސީއީއޯ ނޮއެލް ގްރެގާ ޕެޓާސަން ޖޯންސްއާ ވަނީ މިއަދު ރައީސް ޑރ. މުޢިއްޒުއަށް އިހުތިރާމްގެ ޒިޔާރަތެއް ކުރައްވާފަ އެވެ.
މި ބައްދަލުވުމުގައި އެބޭފުޅުން ވަނީ ރާއްޖޭގެ އިގްތިސޯދު އިތުރަށް ހަރުދަނާކޮށް ޑައިވާސިފައިކުރުމަށް ކުރެވިދާނެ ކަންކަމާ ބެހޭގޮތުން މަޝްވަރާކުރައްވާފައެވެ.
ޑިވެލޮޕްމެންޓް ބޭންކްގެ ޗެއާޕާސަންގެ މަގާމަށް އައްޔަންކޮށްފައިވާ އަރުނީއަކީ ފައިނޭންޝިއަލް ސާވިސް އެކްސްޕާޓްއެކެވެ. އެބޭފުޅާ ވަނީ 25 އަހަރަށްވުރެ ގިނަ ދުވަހު ބައިނަލްއަގްވާމީ ފައިނޭންޝިއަލް މާކެޓުގައި މަސައްކަތް ކުރައްވާފައެވެ. އަދި ހާވާޑް ޔުނިވާސިޓީއިން މާސްޓާސް އިން ލޯ (އެލްއެލްއެމް) ހާސިލް ކުރައްވާފައިވާއިރު، އެބޭފުޅާ އަކީ ބިޒްނަސް އޮރިޖިނޭޝަން، ގަވާނެންސް، ކްރެޑިޓް އެސެސްމަންޓް، އަދި ކުރިއަރަމުން އަންނަ މާކެޓްތަކުގައި ރިސްކް މެނޭޖްމަންޓްގެ ދާއިރާއިން ސްޕެޝަލައިޒްވާ ބޭފުޅެކެވެ.
މީގެއިތުރުން ބޭންކުގެ ސީއީއޯގެ މަގާމަށް އައްޔަން ކުރައްވާފައިވާ ނޮއެލްއަކީ ގްރީން އިންވެސްޓްމެންޓް ދާއިރާގައި ފާހަގަކޮށްލެވޭ މަސައްކަތްތަކެއް ކުރައްވާފައިވާ ބޭފުޅެކެވެ. އެގޮތުން ސައުދީ އަރަބިއްޔާގެ ނެޝަނަލް އިންފްރާސްޓްރަކްޗާ ފަންޑު އުފެއްދުމުގައި އެބޭފުޅާ އިސްކޮށް މަސައްކަތް ކުރެއްވާފައިވާއިރު، މިވަގުތު ނޮއެލް ދަނީ އިލެކްޓްރިކް ވެހިކަލް އެފްރިކާ ފަންޑުގެ ޗެއާގެ މަގާމު ވެސް ފުރުއްވަމުންނެވެ. ނޮއެލްއަކީ އިނގިރޭސިވިލާތުގެ އޮކްސްފޯޑް ޔުނިވާސިޓީއިން މާސްޓާސް އޮފް ފިލޯސޮފީ ހާސިލްކުރައްވާފައިވާ ބޭފުޅެކެވެ.
ޑިވެލޮޕްމަންޓް ބޭންކް އޮފް މޯލްޑިވްސްގެ ބޯޑަށް މިހާތަނަށް ވަނީ ތިން ބޭފުޅެއް އައްޔަން ކުރައްވާފަ އެވެ. އެއީ އަހުމަދު އަލީ އާއި، ސިންގަފޫރު ބޭފުޅެއް ކަމަށްވާ ސައީދު އަބްދުއްނާސިރު ބިން ސައީދު ހަސަން އަލް ޖުނެއިދު އަދި އިނގިރޭސިވިލާތުގެ ބޭފުޅެއް ކަމަށްވާ ރޮބާޓް ޑެނިއަލް ކާޓްއެވެ.
ޑިވެލޮޕްމަންޓް ބޭންކް އޮފް މޯލްޑިވްސްވެގެންދާނީ ރާއްޖޭގެ ޓޫރިޒަމް އިންޑަސްޓްރީގައި ރިސޯޓްތައް ހެދުމަށާއި ރިނުއުބަލް އެނާޖީގެ ދާއިރާއިން އިންވެސްޓްކުރާ ފަރާތްތަކަށް ހަބެއް ކަމުގައި ކަމަށް ރައީސް ޑރ. މުޢިއްޒު ވަނީ ވިދާޅުވެފަ އެވެ.
