ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަޤާމަށް މުހައްމަދު އަބްދުލް ކަރީމް (ރުކުމާ) ޢައްޔަންކޮށްފިއެވެ.
މީގެ ކުރިން ވޭސްޓް މެނޭޖުމަންޓް ކޯޕަރޭޝަން (ވެމްކޯ)ގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި ރުކުމާ ފެނަކައިގެ ޑީއެމްޑީއަކަމަށް އައްޔަންކޮށްފައިވާކަން އެ ކުންފުނިން ވަނީ މިއަދު އިއުލާނުކޮށް މަރުހަބާ ދަންނަވައިފައެވެ.
ރުކުމާއަށް މަރުހަބާ ދަންނަވައި ފެނަކަ ކޯޕަރޭޝަނުން ކުރި ޕޯސްޓެއްގައި ބުނެފައިވަނީ، ފެނަކައިގެ މަސައްކަތްތަކުގައި ރުކުމާގެ ލީޑަޝިޕާއި ތަޖުރިބާ މުހިންމުކަމެވެ.
ފެނަކަގެ ޑީއެމްޑީގެ މަގާމުގައި ހުންނެވި އިބްރާހިމް ނާއިފް ވަނީ އެ މަގާމުން ވަކިކޮށްފައެވެ. ނާއިފް އެމަގާމުން ވަކިކުރެއްވުމާ ގުޅިގެން މިއަދު ފެނަކައިން ވަނީ ނާއިފްގެ ހިދުމަތަށް ޝުކުރު އަދާކޮށްފައެވެ.
ރުކުމާއަކީ މީގެ ކުރިން ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ ކުރީގެ މެންބަރުކަންވެސް އަދާކުރެއްވި ބޭފުޅެއްވެސް މެއެވެ.
