ތައިލެންޑަށް ކުރަމުންދާ މޫސުމީ ވިއްސާރައިގެ ސަބަބުން އެ ގައުމުގެ އުތުރާއި ދެކުނުގައި ފެން ބޮޑުވެ، ގިނަ އަދަދެއްގެ ބަޔަކު މަރުވެއްޖެއެވެ.
މަރުވި މީހުންގެ ތެރޭގައި ތައިލެންޑްގެ ދެކުނުގެ ޕުކެޓް ޕްރޮވިންސްގައި މަރުވި 13 މީހުން ހިމެނެއެވެ. މީގެތެރޭގައި ރަޝިއާއަށް ނިސްބަތްވާ މީހަކާއި، މިޔަންމާއަށް ނިސްބަތްވާ 9 ބިދޭސީ މަސައްކަތްތެރިންގެ އިތުރުން ތައިލެންޑަށް ނިސްބަތްވާ 2 މީހުން ހިމެނެއެވެ.
މި ކާރިސާގައި އިތުރު 19 މީހުންނަށް އަނިޔާވެ، 200އަށް ވުރެ ގިނަ ގެދޮރަށް ގެއްލުންވެފައިވެއެވެ.
މި ހާދިސާގައި ފުނޑުފުނޑުވި ސަރަހައްދުތައް ސާފުކުރުމާއި އަލުން އާރާސްތުކުރުމުގެ މަސައްކަތްތައް މިހާރު ކުރިއަށްދާ އިރު، އަދިވެސް ހުއްޓުމެއް ނެތި ވާރޭ ވެހެމުންދާތީ އިތުރު ބިންގަނޑު ވެއްޓުމުގެ ހާދިސާތައް ހިނގައިފާނެކަމަށް ސަރަހައްދީ އޮފިޝަލުން އިންޒާރުދީފައިވެއެވެ.
މީގެ އިތުރުން އެ ގައުމުގެ އުތުރުގައި ވޭތުވެދިޔަ ދެ ހަފްތާގައި ފެންބޮޑުވުން ކުރިމަތިވެ، މަދުވެގެން 9 މީހުން މަރުވެ، 20،000އަށް ވުރެ ގިނަ ގޭބިސީއަށް ގެއްލުންވެފައިވެއެވެ.
އެ ގައުމުގެ ބޮޑުވަޒީރު ޕެއޮންގްތާން ޝިނަވަތްރާ މިއަދު ވަނީ ގެއްލުންވި ޕްރޮވިންސްތަކުގެ ތެރެއިން އެއް ޕްރޮވިންސްކަމަށްވާ ނާންއަށް ޒިޔާރާތެއް ވެސް ކުރައްވާފައެވެ.
އެ ގައުމުގެ މޫސުމާއި ކާރިސާތަކާބެހޭ އޮފިޝަލުން ބުނާގޮތުގައި މި ހަފްތާގައި މުޅި ޤައުމަށް ބޯކޮށް ވާރޭވެހުމުގެ ފުރުސަތު އެބަ އޮތެވެ. އެހެންކަމުން ކުއްލި ހާދިސާތަކަށް ރައްކާތެރިވެ ތިބުމަށް އެ އިދާރާއިން ވަނީ އެ ގައުމުގެ ރައްޔިތުންގެ ފަރާތުން އިލްތިމާސްކޮށްފައެވެ.
