10 އަހަރަށް ވުރެ ދިގު މުއްދަތަކަށް އެޗްއާރްކަމުގެ މަގާމުގައި މަސައްކަތް ކޮއްފައިވާ ވެލަރީ ރޮޑްރިގޭޒް ބުނާގޮތުން އޮފީސް މަހައުލު މިހާރު ވެފައިވަނީ ކޮންމެ މީހަކުވެސް އެމީހެއްގެ އަމިއްލަ ސިފަތަކެއް ގެންގުޅުމުގެ އިހްތިޔާރު ލިބިފައިވާ މާހައުލެއް ކަމުގައެވެ. އެހެން ނަމަވެސް އެއްވެސް ފިކުރެއްނެތި ހުރިހާ ވާހަކައެއް ހިއްސާ ކުރުމުން ފަހުން ހިތާމަކުރަން ޖެހޭ ހާލަތެއްގައި ތާށިވެދާނެއެވެ. ވެލަރީ ލަފާ ދޭގޮތުގައި ތިރީގައިވާ 3 ކަންތައް ކުރުން ހުއްޓާލުމުން މިފަދަ ކަންކަމުން ސަލާމަތްވާނެއެވެ.
1. ހަފްތާ ބަންދުގައި ކުރަން ނިންމާފައިވާ ކަންކަމުގެ ވާހަކަ ނުދެއްކުން
“އަހަރެންނަމަ ހަފްތާ ބަންދުގައި ކުރާ ކަންކަން އޮފީހުގައި ހިއްސާ ނުކުރާނަމެވެ. ހާއްސަކޮށް، ޝޯއެއް ބަލާލަން، ޕާޓީއަކަށް ނުވަތަ ރިސޯޓަކަށް ދާން އޮތްކަމުގެ ވާހަކަ ނުބުނާނަމެވެ. މިފަހަކުން އަހަރެންގެ ރައްޓިއްސެއް ބުނިގޮތުގައި އޭނާ ބަލިވެގެން އޮފީހަށް ސަލާމް ބުނުމުން އޭނާ އެނައީ ހަފްތާ ބަންދުގައި ޕާޓީކުރީމަ ނުވަތަ ރިސޯޓަށް ދިއުމުން ކަމުގައި އަޑު ފެތުރުނެވެ.” ވަލަރީ ހިއްސާކުރިއެވެ. މިހެން ވީ އޭނާ މީގެ ކުރިން އެނާގެ މެނޭޖަރުގާތު އެހެން ހަފްތާ ބަންދެއްގައި ކޮންސަރޓެއް ބަލައިލަން ދާން އުޅޭވާހަކަ ބުނެފައި އޮތުމުން ކަމުގައި އެކުވެރިޔާ ބުންޏެވެ.
2. މީހާގެ ޕާސަނަލް ކަންކަން ހިއްސާ ނުކުރާށެވެ.
މީހާއަށް ދިމާވާ ޒާތީ ނުވަތަ ޕާސަނަލް ކަންކަން މެނޭޖަރާއި ހިއްސާ ނުކުރާށެވެ. މިސާލަކަށް އަހަރެންގެ ފިރިމީހާއާއި އެކު ޒުވާބު ކުރާވަހަކަ އާއި މިއަދު އޮފީހުގައި މޫޑު އޮފްވެފައިވާކަން ހިއްސާނުކުރާށެވެ. އެހެން ހެދުމުން މެނޭޖަރު ހިތަށްއަރާނީ އޮފީހުގެ މަސައްކަތަށް ފަރުވާ ނުބަހައްޓައި އަމިއްލަ ޒާތީ ކަންކަމާއި މެދު ވިސްނާކަމެވެ. އަދި އަމިއްލަ ދިރި އުޅުމާއި މަސައްކަތުގެ މާހައުލާއި ވަކި ނުކުރެވޭ މީހެއްގެ ގޮތުގައި މެނޭޖަރު ކަނޑައަޅާނެއެވެ.
3. އޮފީހުގެ އެހެން މީހެއްދެކެ ނުރުހޭ ވާހަކަ ދެއްކުން
އޮފީހުގައި އުޅޭ އެހެން މީހެއްގެ ކަމުނުދާ ވާހަކަ މެނޭޖަރުގާތު ދެއްކުމުން ތިބާއަކީ މަސައްކަތައް ފަރުވާ ނުބަހައްޓާ ބޭކާރު ކަންތައް ކުރާމީހަކަށް ވާނެއެވެ. އަދި އޮފީހުގެ އެހެން މީހަކު ގާތުގައި މިފަދަ ވާހަކަ އެއް ނުދައްކާށެވެ. އެއިރުން އޮފީސްތެރޭގައި ޚަބަރު ދައުރުވެ މީހާގެ އަގުވެއްޓިގެން ދާނެއެވެ.
އެހެންކަމުން އޮފީސް މާހަލުގައި ހިއްސާ ކުރާ ވާހަކަތަކާއި މެދު ފަރުވާތެރިވާށެވެ.
