ނުރަސްމީ ދަތުރުފުޅެއްގައި ރައީސްގެ ދެމަފިރިކަނބަލުން ސިންގަޕޫރަށް ފުރައި ވަޑައިގެންފިއެވެ.
އެމަނިކުފާނުގެ މި ދަތުރުފުޅަކީ، މީގެ ދެ އަހަރެއްހާ ދުވަސް ކުރިން ކުރެއްވި ސާޖަރީއަކާ ގުޅިގެން ހެލްތު ޗެކަޕެއް ހެއްދެވުމަށް ކުރައްވާ ދަތުރުފުޅެކެވެ.
އެމަނިކުފާނުގެ މި ޗެކަޕާއި ގުޅޭގޮތުން ރޭ ޕީއެންސީގެ ހަރުގެ ޖަލްސާގައި ދެއްކެވި ވާހަކަފުޅުގައިވެސް އަލި އަޅުއްވައިލެއްވި އިރު، ރޭ އެމަނިކުފާނު ވިދާޅުވީ، މީގެ ދެތިން ރޭ ކުރިން އާރަށުގައި ފުޓުބޯޅަ ކުޅުއްވަނިކޮށް ލިބުނު އަނިޔާއަކާ ގުޅިގެން އައިޖީއެމްއެޗް ހޮސްޕިޓަލަށް ވަޑައިގެންނެވި ކަމަށެވެ.
އެގޮތުން އެމަނިކުފާނު ސިންގަޕޫރަށް ކުރައްވާ ދަތުރުފުޅަކީ، ފުޓުބޯޅަ ކުޅުއްވަނިކޮށް ލިބުނު އަނިޔާގައި މާލޭގައި ތިބި ޑޮކްޓަރުންނަށް ދައްކައި، ދެވަނަ ޚިޔާލެއް ހޯދުމަށް ކުރައްވާ ދަތުރުފުޅެއް ކަމުގައި ރައީސް ވިދާޅުވިއެވެ.
