ފޮރުވައިގެން 81،000ށް ވުރެ ގިނަ ޑޮލަރު ރާއްޖެއިން ބޭރުކުރަން އުޅުނު ބަންގްލަދޭޝް މީހާގެ ބަންދަށް 15 ދުވަސް ޖަހައިފިއެވެ.
ފުލުހުން ވަނީ ހައްޔަރުކުރި މީހާގެ ފޮޓޯއާއި ވަނަވަރު މިހާރު އާންމުކޮށްފައެވެ.
އެގޮން މި މައްސަލައިގައި ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ، އުމުރުން 32 އަހަރުގެ ޝަހްމިން އިސްލާމް ޝަގުރް ނަމަކަށް ކިޔާ މީހެކެވެ.
ފުލުހުން ވިދާޅުވީ، މީގެ ދެ ދުވަސް ކުރިން ބަންގްލާ އެއަރލައިންސްއިން މާލެ އިން ބަންގްލަދޭޝްގެ ވެރިރަށް ޑާކާއަށް ދަތުރު ކުރަން ވެލާނާ އިންޓަނޭޝަނަލް އެއާޕޯޓަށް ދިޔަ ބަންގްލަދޭސް ނިސްބަތްވާ ރައްޔިތެއްގެ ލަގެޖުން ފެނުނު 81،030 ޑޮލަރުގެ މައްސަލައިގައި އޭނާގެ މައްޗަށް މަނީ ލޯންޑަރިންގ ދައުވާ އުފުލައިފައިވާކަމަށާއި އޭނާގެ ބަންދަށް ކްރިމިނަލް ކޯޓުން 15 ދުވަސް ޖަހައިދީފައިވާކަމަށެވެ.
މި ޑޮލަރުތަކާއެކު އޭނާ ހައްޔަރުކޮށްފައިވަނީ އޭވިއޭޝަން ސެކިއުރިޓީ ކޮމާންޑުންނެވެ. އެ އިދާރާއިން ވިދާޅުވީ އެ މީހާ ހައްޔަރުކުރުމަށްފަހު ކަމާއި ބެހޭ ފަރާތްތަކާއި ހަވާލުކޮށްފައިވާކަމަށެވެ.
