ރާއްޖޭގައި ފުޅާ ދާއިރާއެއްގައި ހަށިވިއްކަމުން ދިޔަ ބިދޭސީންތަކެއް އަތުލައިގަނެ އެމީހުން ޑީޕޯޓްކޮށްލައިފިއެވެ.
އިމިގްރޭޝަނުން ވިދާޅުވީ، ފުޅާ ދާއިރާއެއްގައި ބިދޭސީންތަކެއް ހަށިވިއްކަމުންދާކަމަށް ލިބުނު މައުލޫމާތަކާއި ގުޅިގެން މި މަހުގެ 11 ވަނަ ދުވަހު ހިންގުނު އޮޕަރޭޝަނެއްގައި 4 ބިދޭސީއަކު އެ އިދާރާގެ ބެލުމުގެ ދަށަށް ގެނެވުނުކަމަށެވެ.
އެގޮތުން ހައްޔަރުކުރި މީހުންގެ ތެރޭގައި ހިމެނެނީ ހަށިވިއްކުމުގައި ޝާމިލްވާ 3 އަންހެނުންނާއި އެމީހުންގެ އޭޖެންޓުގެ ގޮތުގައި މަސައްކަތް ކުރަމުން ދިޔަ ބިދޭސީ ފިރިހެނަކު ކަމަށް އެ އިދާރާއިން ވިދާޅުވީއިރު އެމީހުންގެ މައްސަލަ ތަހުޤީގުކުރުމަށްފަހު އެ 4 މީހުންވެސް މިހާރު ޑީޕޯޓްކޮށްލައިފައިވާކަމަށް އިމިގްރޭޝަނުން ވަނީ ވިދާޅުވެފައެވެ.
މި މައްސަލައިގައި އުމުރުން 41، 38، 36 ގެ އިތުރުން އެމީހުންގެ އޭޖެންޓުގެ ގޮތުގައި މަސައްކަތް ކުރި 35 އަހަރުގެ މީހެކެވެ.
ޤަވާއިދާއި ޚިލާފަށް ރާއްޖޭގައި އުޅޭ އަދި މަސައްކަތް ކުރާ ބިދޭސީންގެ މައްސަލައަށް ހައްލު ގެނައުމުގެ ގޮތުން ހޯމް މިނިސްޓްރީއާއި އިމިގްރޭޝަން އަދި ފުލުހުން ގުޅިގެން ހިންގަމުން އަންނަ ފުޅާ އޮޕަރޭޝަންގެ ދަށުން ގިނަ އަދަދެއްގެ ބިދޭސީންތަކެއް އަތުލައިގަނެ ޑީޕޯޓްކުރަމުން އަންނަކަން ފާހަގަކޮށްލެވެއެވެ.
