އުމުރުން 12 އަހަރުގެ އަންހެން ކުއްޖަކަށް ޖިންސީ ގޯނާ ކުރި އުމުރުން ދުވަސްވީ މީހާ ކޯޓުން ދޫކޮށްލުމުން އަލުން އެ މީހާ ހައްޔަރުކޮށްފިއެވެ.
ފުލުހުން ވިދާޅުވީ ދެކުނުގެ އަތޮޅެއްގެ ރަށެއްގައި 12 އަހަރުގެ އަންހެންކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލަ އޭޕްރީލް 28 ވަނަ ދުވަހު ފުލުހުންނަށް ރިޕޯޓް ކޮށްފައިވާ ކަމަށާއި، މިމައްސަލަ އާއި ގުޅިގެން މެއި 1 ގައި 61 އަހަރުގެ ފިރިހެނަކު ހައްޔަރު ކޮށްފައިވާ ކަމަށެވެ.
އޭނާގެ މައްޗަށް ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވާފައި ވަނިކޮށް ކޯޓުން ވަނީ އެމީހާ ދޫކޮށްލާފަ އެވެ.
މިއަށްފަހު ކޯޓުގެ ނިންމުން އިސްތިއުނާފު ކުރުމަށްފަހު ކޯޓު އަމުރެއްގެ ދަށުން މިމަހުގެ 9 ވަނަ ދުވަހު ހައްޔަރުކޮށްފައިވާ ކަމަށް ވެސް ފުލުހުން ވިދާޅުވި އެވެ. އަދި މިފަހަރު އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ކޯޓުން ވަނީ ޝަރީއަތް ނިމެންދެން އޭނާ ބަންދު ކުރުމަށް އަމުރުކޮށްފަ އެވެ.
މިމައްސަލަ އާއި ގުޅޭ އިތުރު މައުލޫމާތު ފުލުހުން އަދި ހާމަކޮށްފައެއް ނުވެއެވެ.
މިމައްސަލަ ފެންމަތިވި ދެކުނުގެ ރަށުގެ ރައްޔިތުން ވަނީ އެރަށުގެ ޕޮލިސް ސްޓޭޝަން ކައިރިއަށް އެއް ކުޑަކުއްޖާއަށް ޖިންސީ ގޯނާ ކުރި މީހާ ހައްޔަރު ކުރުމަށް ގޮވާލާ އިހުތިޖާޖު ކޮށްފަ އެވެ. އަނިޔާ ލިބުނު ކުއްޖާގެ އާއިލާއިން ވަނީ މުއްތަހަމް ކުޑަކުއްޖާއަށް އެކި ފަހަރުމަތީން ބެހިފައިވާ ކަމަށް ތުހުމަތު ކޮށްފައެވެ.
