ދިވެހި ސަރުކާރުން ކުރިއަށް ގެންދާ ޑިވެލޮޕްމަންޓް އޮފް ފިޝަރީޒް ސެކްޓަރ ޕްރޮޖެކްޓްގެ ދަށުން ރާއްޖޭގެ 5 ރަށެއްގައި އައިސް ޕްލާންޓު ތަރައްޤީކުރުމަށް ޝައުޤުވެރިވާ ފަރާތްތަކުން ބީލަން ހުށަހެޅުމުގެ ފުރުޞަތު މާލީ ވުޒާރާއިން ހުޅުވާލައިފިއެވެ.
މި މަޝްރޫޢަކީ ސައުދީ ފަންޑް ފޯ ޑިވެލޮޕްމަންޓްގެ އެހީގެ ދަށުން ކުރިއަށް ގެނދިއުމަށް ހަމަޖެހިފައިވާ މަޝްރޫޢެކެވެ.
އައިސް ޕްލާންޓު ތަރައްޤީކުރުމަށް ހަމަޖެހިފައިވާ ރަށްތައް:
- ހއ. އިހަވަންދޫ
- ށ. ކޮމަންޑޫ
- އއ. ރަސްދޫ
- ހއ. ދިއްދޫ
- ގދ. ރަތަފަންދޫ
މާލީ ވުޒާރާއިން ހާމަކޮށްފައިވާ ގޮތުގައި މި މަސައްކަތަށް އެންމެ ގާބިލު ފަރާތެއް ހޮވޭނީ ސައުދީ ފަންޑް ފޯ ޑިވެލޮޕްމަންޓްގެ ‘ގައިޑްލައިން ފޯ ދަ އެގްސެކިއުޝަން އޮފް ވޯކްސް’ އަދި އިންޓަރނޭޝަނަލް ބިޑިންގ (އެން.ސީ.ބީ)ގެ އުސޫލާ އެއްގޮތްވާގޮތުގެ މަތިންނެވެ. އަދި ބިޑު ހުށަހެޅުމުގެ ފުރުޞަތު ހުޅުވާލެވިފައިވަނީ މި ދެ އުސޫލުގައި ބަޔާންކުރާ ޝަރުތުތައް ފުރިހަމަވާ ފަރާތްތަކަށް އެކަނިކަމަށް ވެސް މާލީ ވުޒާރާއިން ބުނެފައިވެއެވެ.
ބީލަން ހުށަހެޅުމުގައި ސަމާލުކަންދޭންވީ އިތުރު ކަންކަން:
- ރަޖިސްޓްރީކުރުމަށް 1500 ރުފިޔާ ނުވަތަ 100 ޑޮލަރުގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހުން
- ބިޑު ސެކިއުރިޓީގެ ގޮތުގައި 250000 ނުވަތަ އެ އަދަދާ އެއްވަރުގެ ޔޫއެސް ޑޮލަރު ހުށަހަޅަން ޖެހުން
- ބިޑު ހުޅުވާ ތާރީޙުން ފެށިގެން 148 ދުވަސް ބިޑް ސެކިއުރިޓީގެ މުއްދަތުގެ ގޮތުގައި ކަނޑައެޅުން
މާލީ ވުޒާރާއިން ހާމަކުރި ގޮތުގައި ބީލަން ހުޅުވުން އޮންނާނީ އޮކްޓޫބަރު 20 ވަނަ ދުވަހު އެ ވުޒާރާގެ ނެޝަނަލް ޓެންޑަރގެ ޖަލްސާކުރާ މާލަމުގައެވެ. އަދި ޕްރޮޖެކްޓްގެ ޕްރީބިޑް ބައްދަލުވުން ބޭއްވުމަށް ހަމަޖެހިފައިވަނީ ސެޕްޓެމްބަރ 10 ވަނަ ދުވަހުގެ 13:00ގައި މައިކްރޮސޮފްޓް ޓީމްސް މެދުވެރިކޮށެވެ.
