ގަވާއިދާ ޚިލާފަށް އުޅޭ ބިދޭސީއެއްގެ މައްސަލަ ރިޕޯޓް ކުރުމަށް މޯލްޑިވްސް އިމިގްރޭޝަނުން ގާއިމް ކޮށްފައިވާ “އިމިގްރޭޝަން ވޮޗް” އަށް މިހާތަނަށް 500 އާއި ގާތް ކުރާ އަދަދަކަށް މައްސަލަ ރިޕޯޓްކޮށްފައިވާ ކަމަށް އިމިގްރޭޝަނުން ވިދާޅުވެއްޖެ އެވެ.
މިއަހަރުގެ ޖުލައި 17 ވަނަ ދުވަހު އިމިގްރޭޝަނުން ލޯންޗުކޮށްފައިވާ މިޕްލެޓްފޯމް މެދުވެރިކޮށް ގަވާއިދާއި ހިލާފަށް އުޅޭ ބިދޭސީންގެ މައްސަލަ ކާކުކަން ނޭނގޭ ގޮތަށް ރިޕޯޓް ކުރެވޭނެ ކަމަށް އިމިގްރޭޝަނުން ވިދާޅުވެފައިވެ އެވެ.
ސިއްރު ހިފެހެއްޓޭގޮތަށް ރިޕޯޓް ކުރެވޭ މިޕްލެޓްފޯމް މެދުވެރިކޮށް ގަވާއިދާއި ޚިލާފަށް ރާއްޖެ އެތެރެވާން އުޅޭ މީހުން ރިޕޯޓް ކުރެވޭއިރު، މިމަހުގެ 26 ވަނަ ދުވަހާއި ހަމައަށް 473 ރިޕޯޓް އިމިގްރޭޝަން ވޮޗްއަށް ހުށަހެޅިފައިވާ ކަމަށް އިމިގްރޭޝަނުން މައުލޫމާތު ދީފައިވާ ކަމަށް އިމިގްރޭޝަންގެ އޮފިޝަލަކާއި ހަވާލާދީ ވަގުތު އޮންލައިން ވަނީ ރިޕޯޓް ކޮށްފައެވެ.
އިމިގްރޭޝަން އޮފިޝަލް ވިދާޅުވެފައިވާ ގޮތުގައި މިހާރު ބަލަމުންދާ މައްސަލަތަކުގެ އަދަދު 369 އަށް އަރާއިރު، ވެރިފައި ކުރަމުންދާ މައްސަލަތަކުގެ އަދަދު 82 އަރާ ކަމަށެވެ. އަދި އިމިގްރޭޝަން ވޮޗް މެދުވެރިކޮށް، އިމިގްރޭޝަން އާއި ނުގުޅޭ 22 މައްސަލައެއް ރިޕޯޓް ކޮށްފައިވާ ކަމަށް ވެސް އިމިގްރޭޝަންގެ އޮފިޝަލް ވަނީ ވިދާޅުވެފަ އެވެ.
