އިސްލާމިކް މިނިސްޓްރީގެ ވެބްސައިޓުގައި ސަދަގާތް ކުރުމަށް ހާއްސަ ޕޭޖެއް ހަަދައި އޮންލައިންކޮށް ސަދަގާތް ކުރެވޭނެ އިންތިޒާމް ހަމަޖައްސައިފިއެވެ.
އިސްލާމިކް މިނިސްޓްރީ މެދުވެރިކޮށް ގުރުއާން ހިފްޒު ކުލާސްތަކަށް އެހީވުމަށާއި، އުމްރާއަށް ފޮނުވުމަށް އެހީވުމާއި، އިސްލާމީ ދާއިރާތަކުން މަތީ ތަޢުލީމަށް އެހީވުމަށާއި، އިސްލާމީ ލައިބްރަރީތައް ގާއިމްކުރުމަށް އެހީވުމަށާއި، މިސްކިތް ބިނާކުރުމަށް އެހީވުމަށާއި، ޤުރުއާން ހިތުދަސްކޮށް ނިންމާ ފަރާތްތައް ޢުމްރާއަށް ފޮނުވުމަށާއި، ދީނީ ހަރަކާތްތަކަށް ސްޕޮންސަރ ދިނުމުގެ އިތުރުން މިސްކިތްތަކަށް އެހީވުމަށް ސަދަގާތް ކުރެވޭނެ އެވެ.
މިއަދު ބޭއްވި ރަސްމިއްޔާތުގައި ވާހަކަދައްކަވަމުން އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވަނީ ސަދަގާތް ކުރުމުގެ މުހިއްމުކަމުގެ މައްޗަށް އަލިއަޅުވާލާ މިނިސްޓްރު ވިދާޅުވީ މިނިސްޓްރީގެ ވެބްސައިޓު މެދުވެރިކޮށް ސަދަގާތް ކުރެވޭނެ އިންތިޒާމް ހަމަޖެހިގެން ދިއުމަކީ އެކަން ކުރުމަށް ބޭނުންވާ ފަރާތްތަކަށް އިތުރު ފަސޭހަކަމެއް ލިބިގެންދާނެކަމެއް ކަމަށެވެ. އެއަށްފަހު މިނިސްޓަރު ވަނީ ދީނީ އެކި ކަންކަމަށް ވީހާވެސް ގިނަ ފަރާތްތަކުން އެހީތެރިކަން ފޯރުކޮށްދެއްވުމަށް އެދިލައްވާފަ އެވެ.
އިސްލާމިކް މިނިސްޓްރީގެ ވެބްސައިޓުގައި ސަދާގާތް ދިނުމަށް ގާއިމްކޮށްފައިވާ ޕޭޖުން ސަދަގާތަކާއި ގުޅޭ ހަބަރުތަކާއި، އެކި ފަރާތްތަކުގެ ދީލަތި އެހީތެރިކަމާއެކު ގާއިމްކުރާ މިސްކިތްތަކުގެ މަޢުލޫމާތާއި ފަންޑުތަކުގެ ރިޕޯޓު ލިބޭނެ އިންތިޒާމް ވަނީ ހަމަޖައްސާފައެވެ.
