ކީރިތި ޤުރުއާން ހިތުދަސްކުރާ ފަރާތްތައް އުމްރާއަށް ފޮނުވުމުގެ މަޝްރޫއު އިފްތިތާހްކޮށް، ފުރަތަމަ އުމްރާއަށް އަލްހާފިޒް އަލީ ރައީފު އަށް އެކަމުގެ ލިޔުން އަރުވައިފި އެވެ.
މިމަޝްރޫއު އިފްތިތާހު ކުރުމަށް ބާއްވާފައިވާ ރަސްމިއްޔާތުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މިއަދު މި މަޝްރޫއު އިފްތިތާހްކޮށް އުމްރާ ދަތުރު އެރުވިފައިމިވަނީ ވަރަށް ހާއްސަ ހާފިޒަކަށް ކަމަށާއި އޭނާއަކީ އެއްވަނަ ދަރަޖައިގައި ގުރުއާނުގެ އާޔަތްތަކުގެ ނަމްބަރާއެކު ހިތުދަސްކޮށްފައިވާ ހާފިޒެއް ކަމަށެވެ.
މިނިސްޓަރު ވިދާޅުވީ މިމަޝްރޫއަކީ ދީލަތި ފަރާތްތަކުގެ އެހީތެރިކަމާއެކު ޤުރުއާން ހިތުދަސްކުރާ ފަރާތްތަކަށް ހިއްވަރު ދިނުމުގެ ގޮތުން ކުރައްވާކަމެއް ކަމަށެވެ.
މިނިސްޓަރު ޝަހީމް ވަނީ ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތުގެ ނިންމުމުގެ ރަސްމިއްޔާތުގައި ޤުރުއާން ހިތުދަސް ކުރާ ފަރާތްތަކަށް ޢުމްރާއަށް ފޮނުވުމުގެ މަޝްރޫޢުއެއް ފެށުމަށް ހަމަޖެހިފައިވާކަން އިއުލާން ކޮށްފައެވެ.
