ޔުކްރެއިނުން ފޮނުވާލި ޑްރޯން ހަމަލާއެއްގައި ރަޝިޔާގެ ދެކުނުގެ ރޮސްޓޮވްގައި ހުރި ތެޔޮ ޑިޕޯއެއްގައި އަލިފާން ރޯވެއްޖެއެވެ.
އިއްޔެ ދިން މި ހަމަލާގައި ރޮސްޓޮވްގެ ކަމެންސްކީ ޑިސްޓްރިކްޓްގައި ހުރި ޑިޕޯގައި ރޯވެފައިވާ އަލިފާން ނިއްވުމުގެ މަސައްކަތް ރޭ ކުރަންފަށާފައިވާކަމަށް އެ ސަރަޙައްދުގެ ގަވަރުނަރު ވަސީލީ ގޮލުބެވް ވަނީ އެ ގައުމުގެ މީޑިއާތަކަށް ވިދާޅުވެފައެވެ. އަދި މި ހާދިސާގައި އެއްވެސް އިންސާނަކަށް ގެއްލުމެއް ލިބިފައި ނުވާކަމަށް ވެސް ވަސީލީ ވިދާޅުވެފައިވެއެވެ.
މީގެ ކުރިން ރަޝިޔާގެ ދިފާޢީ މިނިސްޓްރީން ބުނެފައިވާ ގޮތުގައި އެ ސަރަޙައްދަށް އަމާޒުވި ހަތަރު ޑްރޯން ކުރިން ވަނީ ހަލާކުކޮށްލެވިފައެވެ. ނަމަވެސް ތެޔޮ ޑިޕޯއަށް ދެވުނު ހަމަލާއާ ބެހޭގޮތުން އެއްޗެއް ބުނެފައެއް ނުވެއެވެ.
ރަޝިޔާގެ ސެކިއުރިޓީ ޚިދުމަތްތަކާ ގުޅުން އޮންނަ ބާޒާ ޓެލެގްރާމް ޗެނަލުން ބުނާގޮތުގައި ދެ ޑްރޯން އެ ސަރަޙައްދަށް ވެއްޓުމަށްފަހު ތެޔޮ ޑިޕޯގައި ތިން ޓޭންކެއްގައި އަލިފާން ރޯވެފައިވެއެވެ. ޔުކްރެއިންގެ މި ހަމަލާއަކީ އެ ޤައުމުގެ ހަކަތައިގެ ވަސީލަތްތަކަށް ދެވޭ ހަމަލާތަކުގެ ބަދަލުގައި ރަޝިޔާގެ ތެޔޮ އަދި ގޭސް ވަސީލަތްތައް ނެތިކޮށްލުމަށް ދެވޭ ހަމަލާތަކެކެވެ.
މީގެ ކުރިން ޔުކްރެއިން ބޯޑަރުން ގާތްގަނޑަކަށް 200 ކިލޯމީޓަރު (125 މޭލު) ދުރުގައި ދެވުނު ޑްރޯން ހަމަލާއެއްގެ ސަބަބުން އޯގަސްޓް 18 އިން ފެށިގެން ރޮސްޓޮވްގެ ޕްރޮލެޓާސްކް ސިޓީގައި ހުރި ތެޔޮ ރައްކާކުރާ ތަނެއްގައި އަލިފާން ރޯވެފައިވާކަން ފާހަގަކޮށްލެވެއެވެ. މި ކަމާ ގުޅިގެން ރަޝިއާގެ ކަމާގުޅޭ މިނިސްޓްރީތަކުން ހާމަކޮށްފައިވާ ގޮތުގައި ޔުކްރެއިންއާ އިންވެގެންވާ ވޮރޮނޭޝް ސަރަޙައްދުގައި 8 އެޓޭކް ޑްރޯން ނައްތާލެވުނެ. ނަމަވެސް އިތުރު ތަފްސީލެއް ދީފައެއް ނުވެއެވެ.
ވޮރޮނޭޝްގެ ގަވަރުނަރު އެލެކްސެންޑަރ ގުސެވް ވިދާޅުވީ، އެ ސަރަޙައްދުގައި ޔުކްރެއިނުން ދޫކޮށްލި ޑްރޯނެއްގެ ބައިތަކުން “ގޮވާ ތަކެތި ހުރި ތަނަކާ” ކައިރީގައި އަލިފާން ރޯވިކަމަށެވެ. ނަމަވެސް އެ ހަމަލާގައި އެއްވެސް ތަނެއް ގޮވާފައިނުވާކަމަށް އެލެކްސެންޑަރ ވިދާޅުވެފައިވެއެވެ.
މި މައްސަލައިގައި ރަށިއާގެ ފޮރިން އެފެއާޒް މިނިސްޓްރީގެ ތަރުޖަމާނު މަރިއާ ޒަކަރޯވާ ވިދާޅުވެފައިވަނީ އދ.ގެ ނިއުކްލިއަރ ބެލެހެއްޓުމުގެ އިދާރާއިން “ޙަޤީޤަތްތަކުގެ މައްޗަށް” ޢަމަލުކުރަންވާނެކަމަށެވެ. އަދި “ކީވްގެ ވެރިކަމުން އެންމެން ވެސް ދަނީ ނުރައްކާތެރި މަގަކަށް ދޫކޮށްލަމުންކަމަށާއި އެ މަގުން ކުރިއަށް ދިއުން ހުއްޓުވައި ރައްކާތެރިކަން ކަށަވަރުކުރަންވާނެ” ކަމަށް ސަރުކާރުގެ ނޫސް އޭޖެންސީ އާރްއައިއޭއިން ހާމަކޮށްފައިވެއެވެ.
އައިއޭއީއޭގެ ވެރިޔާ ރަފައެލް ގްރޮސީ ވަނީ އަންގާރަ ދުވަހު ކުރްސްކް ނިއުކްލިއަރ ޕަވަރ ޕްލާންޓަށް ޒިޔާރަތްކުރައްވާފައެވެ. މި ޕްލާންޓް ހުރީ ކުރްސްކް ސަރަޙައްދުގެ ކުރްޗަޓޮވް ރަށުގެ ބޭރުގައެވެ. މިއީ ތިން ހަފްތާ ކުރިން ޔުކްރެއިންގެ ބާރުތަކުން އެ ސަރަޙައްދަށް ވަދެގަތް ތަނެކެވެ. ޔުކްރެއިނުން އެ ޕްލާންޓަށް ހަމަލާދިން ކަމަށް ރަޝިއާއިން ކުރި ތުހުމަތުތަކަށް ޔުކްރެއިނުން އަދި ޖަވާބެއް ދީފައެއް ނުވެއެވެ.
