ސްލޯޕިން މަސައްކަތަށް ކ.ތިލަފުށީ ފަޅުތެރޭގައި ހުރި އުޅަނދުތައް ނަގަން އަންގައިފި އެވެ.
ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން މިއަދު ކުރި އިއުލާނެއްގައި ވަނީ ތިލަފުށި ތަރައްގީ ކުރުމަށް ހިއްކަން ޖެހޭ ސަރަހައްދުތައް ހިއްކުމަށްފަހު ސްލޯޕިން މަސައްކަތް ކުރަމުންދާތީ އެ ސަރަހައްދުގެ ފަޅުތެރޭގައި އަޅާފައިވާ އުޅަނދުތައް ނަގަން ބޭނުންވާ ކަމަށް އަންގާފައެވެ.
އެކޯޕަރޭޝަނުން ވަނީ މިއަދުން ފެށިގެން ރަސްމީ ހަތް ދުވަހުގެ ތެރޭގައި އެސަރަހައްދުގައި އަޅާފައިވާ އުޅަނދުތައް ނެގުމަށް އަންގާފައެވެ. އަދި މިމުއްދަތުގެ ތެރޭގައި އެއުޅަނދުތައް ނަގާފައި ނުވާނަމަ އެޗްޑީސީގެ އުސޫލު ނަންބަރު G-7/2023 “ކ.ތިލަފުއްޓާއި ކ.ގުޅީ ފަޅުތެރެޔަށް ދޫކޮށްލާފައިވާ އުޅަނދުފަހަރާއި ތަކެއްޗާއިމެދު އަމަލުކުރުމުގެ އުސޫލު”ގެ ދަށުން ފިޔަވަޅު އަޅާނެ ކަމަށް ވެސް ބުނެފައިވެއެވެ.
މީގެއިތުރުން، އެކޯޕަރޭޝަނުން ވަނީ މިކަމާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ ނަމަ އެޗްޑީސީގެ ހޮޓްލައިން 1516 އަށް ގުޅައިގެން މައުލޫމާތު ސާފު ކުރުމަށް އެދިފައެވެ.
ތިލަފުށި ހިއްކައި ތަރައްގީ ކުރުމުގެ މަޝްރޫއަކީ ވިޔަފާރިވެރިންނަށް ފުރުސަތު ފަހިކޮށްދިނުމަށް އެޗްޑީސީ އިން ކުރިއަށް ގެންދާ މަޝްރޫއެކެވެ. އެޗްޑީސީ އިން ވަނީ ހުރިހާ ފާރާތްތަކުން ވެސް މިމަސައްކަތުގައި އެއްބާރުލުން ދިނުމަށް އެދިފައެވެ. މީގެއިތުރުން، ވިޔަފާރިވެރިންގެ ފަރާތުން ވެސް މިހާތަނަށް ލިބުނު އެއްބާރުލުން ފާހަގަކޮށް އެޗްޑީސީން ވަނީ ޝުކުރު އަދާ ކޮށްފައެވެ.
