ރޭ ދަންވަރު މާލޭގެ ތިން އޮފީހެއް ފަޅާލައި ސުންނާފަތިކޮށްލައިފިއެވެ.
ފުލުހުން ވިދާޅުވި އަމީރު އަހްމަދު މަގުގައި ހުންނަ ތިން އޮފީހެއް ފަޅާލައި ވައްކަންކުރި ކަމުގެ މައުލޫމާތު ރޭ ދަންވަރުގެ ވަގުތެއްގައި ލިބިފައިވާކަމަށެވެ.
ރޭ ދަންވަރު ފަޅާލައިފައިވަނީ، އިނާ މޯލްޑިވްސް އައިލެންޑް ޗޮއިސް ގެ އިތުރުން އޭސް ޓްރެވަލްސް އަދި ގަތަރު ކާގޯގެ އޮފީހެވެ.
އިނާ މޯލްޑިވްސްގެ އޯނަރު މުހައްމަދު ފިރާގު ފޭސްބުކްގައި ކުރެއްވި ޕޯސްޓެއްގައިވަނީ، އޭނާގެ ދެ އޮފީހަކަށް ރޭ މެންދަމުގެ ވަގުތެއްގައި ހީނުކުރާ ގޮތަކަށް ބަޔަކު ޒިޔާރަތްކޮށްފައިވާ ކަމަށް ބުނެފައެވެ.
ރޭގެ މި ހާދިސާގައި މުހިއްމު ތަކެތި ގެއްލިފައި ނުވި ނަމަވެސް އެތާގެ އެތެރޭގައި ހުރި ތަކެތި ހަލާކޮށް ސުންނާފަތިކޮށްފައިވާ ކަމަށް ފިރާގް ވިދާޅުވެފައިވެއެވެ.
ފިރާގު ވިދާޅުވެފައިވަނީ ޒުވާނުން އަމިއްލައަށް ރަނގަޅު މަސައްކަތެއްކޮށް ތެދުވެރި ދިރިއުޅެމުން އުޅެންޖެހޭ ކަމަށެވެ. ވައްކަން ކުރުމަކީ ހައްލު ނޫން ކަމަށެވެ.
ފުލުހުން ވަނީ މި މައްސަލަ އިތުރަށް ތަހުގީގުކުރަމުން އަންނަ ކަމުގައި ވިދާޅުވެފައެވެ.
