ރާއްޖޭގެ ތާރީޚުގައިވެސް މިހާތަނަށް ހިންގުނު ތަރައްގީގެ އެންމެ ބިޔަ މަޝްރޫޢު، ސިނަމާލެ ބްރިޖަކީ ރާއްޖެއާއި ޗައިނާ އާއި ދެ ޤައުމުގެ ދެމެދުގައިވާ ގުޅުމުގެ ރަމްޒެއްކަމުގައި ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
އެމަނިކުފާނު މިފަދައި ވިދާޅުވީ، ސިނަމާލެ ބުރިޖަށް ހަ އަހަރު ފުރުމުގެ މުނާސަބަތުގައި ކުރެއްވި ޕޯސްޓެއްގައެވެ.
ރައީސްގެ ޕޯސްޓްގައި ވިދާޅުވީ، ސިނަމާލެ ބްރިޖަކާ ހަމައެކަނި ދެ ރަށެއް ގުޅުވައިދޭ ފާލަމެއް ނޫން ކަމަށާއި އެއީ ޗައިނާއާއި ރާއްޖެއާ ދެމެދު އޮންނަ ޒަމާންވީ ގުޅުމުގެ އިތުބާރުގެ ރަމްޒެއްކަމަށެވެ.
އެގޮތުން ސިނަމާލެ ބްރިޖަކީ، އެއްބަވައިންތަކަމާއި ކުރިއެރުމުގައި ދެ ގައުމުން ހިއްސާކުރާ ތަޞައްވުރުގެ ހެކިތަކެއް ކަމަށް ވިދާޅުވެ ރައީސް ވަނީ، މި ބުރިޖު ދެ ގައުމުގެ އެއްބާރުލުން ދިނުމުގެ ނިޝާނެއްގެ ގޮތުގައި އަންނަން އޮތް ޖީލުތަކަށް ވެސް ޚިދުމަތްކުރާނެކަމުގައި ވިދާޅުވެފައެވެ.
ސިނަމާލެ ބުރިޖަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ޗައިނާގެ ހިލޭ އެހީގެ ދަށުން ބިނާކުރި ބުރިޖެކެވެ. ބުރިޖުގެ މަސައްކަތް ނިންމާ، ރަސްމީކޮށް ބުރިޖު ހުޅުވީ އޯގަސްޓް 30، 2018 ގައެވެ.
ސިނަމާލެ ބްރިޖަކީ މިހާތަނަށް ރާއްޖޭގައި ހިންގާފައިވާ މި ބާވަތުގެ އެންމެ ބޮޑު މަޝްރޫ އެވެ. މިހާރު ވިލިމާލެ ބުރިޖުގެ މަސައްކަތްދަނީ ކުރިއަށެވެ.
