މާލޭގެ މިސްކިތްތަކުގައި ހުކުރު ޚުޠުބާ އިއްވާ ފަރާތްތަކުގެ ދަފްތަރު އަންނަ ހަފުތާގައި މުރާޖާ ކުރުމަށް ނިންމާފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސައީދު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، ޚުޠުބާ އިއްވުމުގައި ބައެއް އިމާމުން ކުށްކިޔާކަމަށް ބުނެ، ބައެއް ފަރާތްތަކުން ކަންބޮޑުވުން ފާޅުކުރުމާ ގުޅިގެންނެއެވެ.
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސައީދު މި ކަމާ ގުޅޭގޮތުން މީޑިއާތަކަށް ހިއްސާކުރެއްވި މައުލޫމާތުގައި ވިދާޅުވީ ޚުޠުބާ ކިޔާ ފަރާތްތަކުން ކުށްކިޔާކަމަށް އެ ވުޒާރާއަށް ޝަކުވާތައް ލިބެމުންދާކަމަށާއި، މާލޭ ސަރަހައްދުގައި ޚުޠުބާ އިއްވާ ފަރާތްތަކުގެ ދަފްތަރު އަލުން މުރާޖާ ކުރުމަށް މިހާރު ވަނީ ނިންމާފައިކަމަށެވެ. މި ކަން ޑރ. ޝަހީމް ވަނީ އެކްސްގައި ވެސް އާންމުކުރައްވާފައެވެ.
ޚުތުބާ ކިޔުއްވާ ބައެއް ބޭފުޅުން ކުށް ކިޔާކަމަށް ވިދާޅުވެ، އެ ކަމާމެދު ކަންބޮޑުވުން ފާޅުކުރައްވާ ޝައިޚް އަލީ ޒައިދު އިއްޔެ އެކްސްގައި ޕޯސްޓެއް ޖެއްސެވިކަން ވެސް ފާހަގަކޮށްލެވެއެވެ. ވަޒީރު ޑރ. ޝަހީމް ވަނީ ޒައިދުގެ ޕޯސްޓަށް ރައްދުދެއްވާފައެވެ. ޝަހީމް ރައްދުދެއްވައި އެކްސްގައި ކުރެއްވި ޕޯސްޓްގައި ވިދާޅުވީ، މާލޭ ސަރަހައްދުގައި ޚުތުބާ ކިޔާ މީހުންގެ ލިސްޓު އަންނަ ހަފުތާގައި މުރާޖާކުރަން ނިންމާފައިވާކަމަށެވެ. އަދި އެ ކަން ކުރެއްވުމުގައި އިލްމީ، ގާބިލު، އަދި ހުނަރުވެރި ބޭފުޅުންނަށް ފުރުސަތު ދޭން އިސްކަން ދެއްވާނެކަމަށް ވެސް ޝަހީމް ވަނީ ވިދާޅުވެފައެވެ.
ޝަހީމް އިތުރަށް ވިދާޅުވީ، މާލެ ސަރަޙައްދުގެ އިތުރުން އަތޮޅުތަކުގައި ވެސް ޒުވާން، ތަޢުލީމީ ޚަޠީބުންނާއި އިމާމުން އުފެއްދުމަށްޓަކައި ގިނަގުނަ މަސައްކަތްތަކެއް ކުރައްވަމުންގެންދަވާކަމަށެވެ.
