ފެނަކަ ކޯޕަރޭޝަން ލިމިޓެޑުން ފޯރުކޮށްދޭ ކަރަންޓުގެ ޚިދުމަތް އިތުރަށް ރަނގަޅުކުރުމަށް 45 ރަށަކަށް ޖަނަރޭޓަރު ގެންދިއުމުގެ މަސައްކަތް ފަށާފައިވާކަމަށް އެ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވެއްޖެއެވެ.
މުއާޒު މިފަދައިން ވިދާޅުވީ ޤައުމީ ޗެނަލް، ޕަބްލިކް ސާވިސް މީޑިއާ (ޕީއެސްއެމް)އިން ގެނެސްދޭ ރާއްޖެމިއަދު ޕްރޮގްރާމުގައި ވާހަކަދައްކަވަމުންނެވެ.
މި އަހަރު ފެށުނު އިރު ފެނަކަ ކޯޕަރޭޝަނުން ކަރަންޓުގެ ޚިދުމަތް ފޯރުކޮށްދޭ ގިނަ ރަށްރަށުގެ ޖަނަރޭޓަރުތަކުގެ ހާލަތު ހުރީ ވަރަށް ދަށަށް ގޮސްފައިކަން ފާހަގަކޮށްލެވޭކަމަށް މުއާޒު ވިދާޅުވިއެވެ. އޭގެ ތެރެއިން ގިނަ ޖަނަރޭޓަރުތައް ހުރީ އޯވަރހޯލް ކުރަންޖެހިފައިކަމަށް ވެސް މުއާޒު ވިދާޅުވިއެވެ.
މުއާޒު ވިދާޅުވީ މި ކަމާ ގުޅިގެން އެންމެ ހާލަތު ގޯސްކަމަށް ބެލެވޭ ރަށްތަކަށް މިހާތަނަށް 47 ޖެންސެޓު ފޯރުކޮށްދީފައިވާނެކަމަށެވެ. އެހެންނަމަވެސް އަދިވެސް ޖަނަރޭޓަރުތަކުގެ ހާލަތު ގޯސް ވަރަށް ގިނަ ރަށްރަށް އެބަ ހުރިކަމަށާއި ކުރިއަށް އޮތް ރަމަޟާން މަހުގެ ކުރިން އެ ރަށްރަށަށް ބޭނުންވާ ޖަނަރޭޓަރުތައް ހޯދުމުގެ މަސައްކަތް ފެނަކައިން ކުރަމުން އަންނަކަމަށް މުއާޒު ވިދާޅުވިއެވެ. މީގެ އިތުރުން އެ ޖަނަރޭޓަރުތައް އޯވަރ ހޯލްކުރުމަށް ބޭނުންވާ ސްޕެއަރތައް ވެސް ރަމަޟާން މަހުގެ ކުރިން ހޯދުމަށް އަމާޒުހިފާފައިވާކަން މުއާޒު ފާހަގަކުރެއްވިއެވެ.
މީގެ ކުރީ އަހަރުތަކުގައި ރަށްރަށުގެ އިންޖީނުގެތަކާ މެދު އިހުމާލުވެފައިވާކަމަށާއި މެއިންޓެނެންސްގެ މަސައްކަތްތައް އެކަށީގެންވާ ގޮތެއްގައި ކޮށްފައިނުވާކަން މުއާޒު ވަނީ އެ ޕްރޮގްރާމްގައި ފާހަގަކުރައްވާފައެވެ. އެހެންކަމުން ކަރަންޓުގެ ޚިދުމަތް މިހާރަށް ވުރެ ރަނގަޅުކުރުމަށްޓަކައި ރަށްރަށުގެ ކަރަންޓު ނެޓްވޯކް އަޕްގްރޭޑުކުރުމަށް ވެސް ގިނަ މަސައްކަތްތަކެއް ކުރުމަށް ރާވާފައިވާކަމަށް މުއާޒު ވިދާޅުވިއެވެ. އެގޮތުން އެންމެ ހާލަތު ދަށް 15 ރަށުގައި މި މަސައްކަތް ވަރަށް އަވަހަށް ފެށިގެންދާނެކަމަށް މުޢާޒު ވިދާޅުވިއެވެ.
ރާއްޖޭގެ ގިނަ ރަށެއްގައި ކަރަންޓުގެ ޚިދުމަތް ދިނުމުގެ އިތުރުން ފެނާއި ނަރުދަމާގެ ނިޒާމުތައް ބެލެހެއްޓުމުގެ މަސައްކަތް ވެސް ފެނަކައިން ދަނީ ކުރަމުންނެވެ.
