ޤަވާއިދާއި ޚިލާފަށް ރާއްޖެ އެތެރެވެ އުޅޭ ބިދޭސީންގެ މައްސަލަ ޙައްލުކުރުމަށް ކުރިއަށް ގެންދާ އޮޕަރޭޝަންގެ ދަށުން، ވިސާ ފުރިހަމަ ނޫން 273 ބިދޭސީންނަށް ނޯޓިސް ދީފައިވާ ކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.
އެ އިދާރާއިން ވިދާޅުވީ، މާލެ ސަރަހައްދުގައި ޤަވާއިދާ ޚީލާފަށް ވިޔަފާރިކޮށް، ސައްޙަ ވިސާއެއް ނެތި އުޅެމުންދާ ބިދޭސީން ބަލައި ފާސްކުރުމަށް ހިންގަމުން އަންނަ އޮޕަރޭޝަންގެ ދަށުން މިދިޔަ ބުދަ ދުވަހު ކުރިއަށް ގެންދިޔަ ޚާއްސަ އޮޕަރޭޝަނެއްގައި މާލޭގެ 582 ތަނެއް ބަލައި ފާސްކޮށް، 1،025 ބިދޭސީންނާ ސުވާލުކޮށްފައިވާ ކަމަށެވެ.
އެގޮތުން ބަލައި ފާސްކުރެވުނު މީހުންގެ ތެރެއިން ވިސާ ފުރިހަމަ ނުވާ 273 ބިދޭސީންނަށް ނޯޓިސް ދީފައިވާނެ ކަމަށާއި ޤަވާއިދާއި ޚިލާފަށް ބިދޭސީން ލައްވައި މަސައްކަތް ކުރުވި 120 ދިވެހިންނަށް ލިޔުމުން ނަސޭހަތް ދީފައިވާނެ ކަމަށްވެސް އިމިގްރޭޝަނުން ވަނީ ވިދާޅުވެފައެވެ.
މީގެ އިތުރުވެސް ފިލައިގެން ރާއްޖޭގައި އުޅެމުންދިޔަ 10 މީހަކު ހޯދައި އިމިގްރޭޝަންގެ ބެލުމުގެ ދަށަށް ގެންދެވިފައިވާކަމަށް އެ އިދާރާއިން ހާމަކުރެއްވިއެވެ.
