ހުޅުމާލޭ އިންޑަސްޓްރިއަލް ޒޯނުގައި ބަހައްޓާފައި ހުރި ބާވެފައިވާ ވެހިކަލްތައް ނަގައި، އެ ސަރަޙައްދު ސާފުކުރުމުގެ މަސައްކަތް ހައުސިންގ ޑިވެލޮޕްމަންޓް ކޯރޕަރޭޝަން (އެޗްޑީސީ)އިން ފަށައިފިއެވެ.
އެގޮތުން އިންޑަސްޓްރިއަލް ޒޯނު ހިމެނޭ ސަރަހައްދުގައި ޕާކު ކޮށްފައިވާ އުޅަނދުތަކާއި ދުވާރުމަތީ ބަހައްޓާފައިވާ ތަކެތި ނަގައި އެ ސަރަހައްދު ސާފުކުރުމުގެ މަސައްކަތް އެޗްޑީސީން އިއްޔެ ފަށާފައިވާކަން ހާމަކޮށް އެޗްޑީސީން ވަނީ އެކްސްގައި ޕޯސްޓެއް އާންމުކޮށްފައެވެ.
މި މަސައްކަތުގައި އެޗްޑީސީގެ އިތުރުން ދަތުރުފަތުރާބެހޭ ވުޒާރާއާއި، ފުލުހުންނާއި، އެމްޕީއެލާއި، މާލޭ ސިޓީ ކައުންސިލް އަދި ވެމްކޯއިން ބައިވެރިވެ އެޗްޑީސީގެ މަސައްކަތަށް އެހީތެރިކަން ފޯރުކޮށްދެމުން އަންނަކަން ފާހަގަކޮށްލެވެއެވެ.
އެޗްޑީސީން ހާމަކޮށްފައިވާ ގޮތުގައި ހުޅުމާލޭ ފުރަތަމަ ފިޔަވަހީގެ އިންޑަސްޓްރިއަލް ޒޯނުގައި މަދިރި އުފެދޭ ގޮތަށާއި ގަވާއިދާ ހިލާފަށް ދުވާރު މަތީގައި ތަކެތި ބަހައްޓާފައި ހުރުމުގެ ސަބަބުން އާންމު ރައްޔިތުންނަށް ގިނަ އުނދަގޫތަކާ ކުރިމަތިވުމުގެ އިތުރުން ނުރައްކާތެރި ބަލިތައް ފެތުރުމުގެ ފުރުޞަތު ވެސް ވަނީ ބޮޑުވެފައެވެ.
އެޗްޑީސީން ހާމަކުރި ގޮތުގައި މި މަސައްކަތަކީ ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރަމުންދާ މަސައްކަތުގެ ތެރެއިން ފެށި މަސައްކަތެކެވެ.
އެ ސަރަހައްދުގައި ޤަވާއިދާ ޚިލާފަށް ދުވާރު މަތީގައި ބަހައްޓާފައި ހުރި ތަކެތި ނެގުމަށް މީގެ ކުރިން އެޗްޑީސީން އާންމުކޮށް އަންގާ އިއުލާނުކޮށްފައިވެއެވެ.
