ސިންގަޕޫރުގެ ބީޗް ރޯޑުގައި ހުންނަ ޝޮޕިންގ ކޮމްޕްލެކްސްއެއްކަމުގައިވާ ގޯލްޑަން މައިލް ޓަވަރުގައި އަލިފާނުގެ ހާދިސާއެއް ހިނގައިފިއެވެ.
މި ހާދިސާގެ މަޢުލޫމާތު ސިންގަޕޫރު ސިވިލް ޑިފެންސް ފޯސް (އެސްސީޑީއެފް)އަށް ލިބިފައިވަނީ އިއްޔެ މެންދުރު ގާތްގަނޑަކަށް 12:50 ހާއިރެވެ. އެސްސީޑީއެފުން އިއްޔެ މެންދުރުފަހު 2:30 ގައި ސޯޝަލް މީޑިއާގައި އާންމު ކުރި ވީޑިއޯއިން އެ ސަރަހައްދުގައި ހުރި ގިނަ އުޅަނދުތަކެއްގައި އަލިފާން ރޯވަމުންދާ މަންޒަރު ފެނެއެވެ.
ބޮޑު ދެ ފެންހޮޅި ބޭނުންކޮށްގެން ރޯވަމުން ދިޔަ ކާރުތަކުން އަލިފާން ނިއްވާލާފައިވާކަމަށް އެސްސީޑީއެފުން ހާމަކޮށްފައިވެއެވެ. އަދި މި ހާދިސާގައި ބީޗް ރޯޑުގައި ހުންނަ އޮފީސް އަދި ގޯލްޑަން މައިލް ޓަވަރ ޝޮޕިންގ ކޮމްޕްލެކްސްގައި ތާށިވެފައި ތިބި 45 މީހުން އެ ގައުމުގެ ފުލުހުންނާއި އެސްސީޑީއެފުން ސަލާމަތްކަމާއެކު ނެރެފައިވާކަމަށް ވެސް އެސްސީޑީއެފުން ބުނެފައިވެއެވެ.
މި ހާދިސާގައި ދުމުގެ އަސަރުކޮށްގެން 3 މީހަކަށް ގެއްލުންވެފައިވާކަމަށާއި ހޮސްޕިޓަލުގައި ފަރުވާދޭންޖެހޭ މިންވަރަށް އެއްވެސް މީހަކަށް ގެއްލުމެއް ލިބިފައިނުވާކަމަށް އެސްސީޑީއެފުން ބުނެއެވެ.
އިބްތިދާއީ ހޯދުންތަކުން ދައްކާގޮތުގައި އަލިފާން ރޯވި ކާރުތަކަކީ އިލެކްޓްރިކް ވެހިކަލްތަކެއް ނޫނެވެ.
އެސްސީޑީއެފްއިން މިހާރު ދަނީ އަލިފާނުގެ ހާދިސާ ހިނގި ސަބަބު ބަލަމުންނެވެ.
