މާލޭގައިވެސް ސަރުކާރުގެ ފަރާތުން މަތީ ސާނަވީ ތަޢުލީމުދޭ މަރުކަޒެއް ޤާއިމްކުރުމުގެ ގޮތުން ކުރިން ސީއެޗްއެސްސީ ހިންގި އިމާރާތް މަރާމާތުކޮށް އަލުން އެތަނުގައި ކިޔަވައިދޭން ފަށައިފިއެވެ.
އެގޮތުން މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމުގެ ސަބަބުން އެކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރަމުންދާކަމުގައި ވިދާޅުވެ، މާލޭގައި ސަރުކާރުގެ އޭލެވެލް ސްކޫލެއް ހުޅުވަން ނިންމާފައިވާ ކަން މިދިޔަ ޖޫން މަހުގެ 30 ވަނަ ދުވަހު އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވަނީ އިއުލާނު ކުރައްވައިފައެވެ.
އެގޮތުން ކުރީގެ ސީއެޗްއެސީ އިމާރާތް މަރާމާތު ކުރުމަށްފަހު އެތަނުގައި މާލޭ ސީއެޗްއެސްސީ ހިންގަން ފެށިކަން އިއުލާނުކުރައްވައި މިނިސްޓަރ މިއަދު ވިދާޅުވީ، މި ސްކޫލު ވެގެން ދާނީ ފުރަމާލޭގައި ހުރި މަތީ ސާނަވީއަށް ކިޔަވައިދޭ އެންމެ ފެންވަރު ރަނގަޅު، ހިތްފަސޭހަ އަދި ދަރިވަރުންނަށް އުފާވެރި އުގެނުމުގެ މާހައުލު ތަނަވަސްވެފައިވާ ސްކޫލަށް ކަމުގައެވެ.
އެގޮތުން މި ސްކޫލް ހުޅުވުމާއެކު، މަތީ ސާނަވީއަށް އުނގެނުމަށް، ފުރަމާލެ އާއި ހުޅުމާލެއާ ދެމެދު ދަތުރުކުރާ ދަރިވަރުންގެ އަދަދު މަދުވެގެންދާނެކަން މިނިސްޓަރ ވަނީ ފާހަގަކުރައްވައިފައެވެ.
އަދި މިކަމުގެ ސަބަބުން ގާތުން ތައުލީމު ފޯރުކޮށްދިނުމުގެ ސިޔާސަތު ތަންފީޒު ކުރެވި ދަރިވަރުންނާއި ބެލެނިވެރިންނަށް ނުހަނު ބޮޑު ފަސޭހައެއް ލިބިގެންދާނެކަމުގައިވެސް ވަޒީރު ވަނީ ވިދާޅުވެފައެވެ.
ފުރަމާލެ އަކީ ދިވެހިރާއްޖޭ ގައި އެންމެ ގިނަ ދަރިވަރުން ކިޔަވަމުންދާ ރަށް ކަމަށްވާއިރު މިހިނގާ 2024 ވަނަ އަހަރު ގްރޭޑް 10 ގައި 1700 ދަރިވަރުން މާލޭގާ ކިޔަވަމުންދާ ކަން މިނިސްޓަރު ފާހަގަ ކުރެއްވިއެވެ.
މާލޭގައި ކުރީން ހިންގަމުން އައި ސީއެޗްއެސްސީ މިހާރު ހިންގަނީ ހުޅުމާލޭގައި ރައީސް އިބްރާހީމް މުހައްމަދު ޞާލިހްގެ ސަރުކާރުން އަލަށް އިމާރާތްކުރި ސްކޫލް އިމާރާތުގައެވެ.
