މި ސަރުކާރުން ރާއްޖޭގައި ޤާއިމްކުރުމަށް ނިންމާފައިވާ ކެންސަރު ހޮސްޕިޓަލުގެ މަސައްކަތަކަށް ބޭނުންވާ އެހީ ހޯދުމަށްޓަކައި އދ.ގެ އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ)ގައި ރާއްޖެއިން ބައިވެރިވުމަށް ނިންމައިފިއެވެ.
މިކަން އިއުލަނުކުރައްވައިފައިވަނީ މިއަދު ބޭއްވުނު ވަޒީރުންގެ މަޖިލިހުގެ ބައްދަލުވުމުގައި ނިންމުނު ކަންކަމާއި ބެހޭގޮތުން މަޢުލޫމާތު ދިނުމަށް އެ ބައްދަލުވުމަށްފަހު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމެއްގައި ފޮރިން މިނިސްޓަރު މޫސާ ޒަމީރެވެ.
ވަޒީރު ވިދާޅުވީ، ޖުމުލަ 178 ޤައުމު ބައިވެރިވާ އދ ގެ އެ އެޖެންސީގައި މި ސަރަހައްދުން މިހާރު ބައިވެރި ނުވެ އޮތީ ރާއްޖެއާއި ބޫޓާން އެކަނި ކަމަށެވެ.
އެގޮތުން ކެންސަރު ހޮސްޕިޓަލެއް ވަރަށް އަވަހަށް ހުޅުވައި، ޚިދުމަތް ލިބޭނެ ގޮތް ހެއްދެވުމުގެ މަސައްކަތް ރައީސް ކުރައްވަމުން ގެންދަވާކަން ފާހަގަކުރައްވައި ވަޒީރު ވިދާޅުވީ، އެ ހޮސްޕިޓަލު ޤާއިމްކުރުމަށްޓަކައި މި ޒަމާނުގެ މެޑިސިންގައި އެޓޮމިކް އޭޖެންސީގެ އެހީތެރިކަން ވަރަށް ބޮޑަށް ބޭނުންވާކަމަށެވެ.
އޭގެ ތެރޭގައި ހޮސްޕިޓަލަށް ބޭނުންވާ ބައެއް ކަހަލަ އިކުއިޕްމެންޓް ހޯދުމާއި ވޭސްޓް މެނޭޖްމެންޓް ކުރުންފަދަ ކަންކަމަކީ، އައިއޭއީއޭގެ ންޑޭޓުގެ ތެރޭގައި ހިމެނިފައިވާކަންކަން ކަމުގައި ވަޒީރު ފާހަގަކުރެއްވިއެވެ.
ވުމާއެކު ހެލްތު މިނިސްޓްރީއާއި އެންވަޔަރަމަންޓް މިނިސްޓްރީއާ ގުޅިގެން އެ އެޖެންސީގައި ރާއްޖެއިން ބައިވެރިވުމުގެ މަސައްކަތް ކުރިއަށް ގެންދިއުމަށާއި އެ މަސައްކަތުގައި އިސްކޮށް ހަރަކާތްތެރިވާނެ ވުޒާރާއަކީ ޑިފެންސް މިނިސްޓްރީ ކަމަށް ވަޒީރުންގެ މަޖިލިހުން ކަނޑައަޅައިފައިވާ ކަމަށް ޒަމީރު ވިދާޅުވިއެވެ.
އެގޮތުން މި ނިންމުން ރައްޔިތުންގެ މަޖިލިހަށް ހުށަހެޅުމަށްފަހު އައިއޭއީއޭއާ ގުޅުމަށް މަޖިލިހުން ރުހުން ދިނުމާއެކު އެ އޭޖެންސީއާ ގުޅުމުގެ މަސައްކަތްތައް ކުރިއަށްގެންދާނެ ކަމަށްވެސް ވަޒީރު ވިދާޅުވިއެވެ.
އަދި ކެންސަރު ހޮސްޕިޓަލު ނިމެންވާއިރަށް އެ އޭޖެންސީގައި ބައިވެރިވެވި، އައިއޭއީއޭއިން ލިބެންވީ ފައިދާތައް ލިބޭނެ ކަމުގެ އުއްމީދު އޮތް ކަމަށް އޭނާ ވިދާޅުވިއެވެ.
