ގުނަވަންތަކަކީ ނިޢުމަތެއް ކަމަށާއި ދުވެލިމަޑުކޮށް މަގުމަތީގެ ރައްކާތެރިކަމާމެދު ޒުވާނުން ރައްކާތެރިވުމަށް އިސްލާމިކް މިނިސްޓަރ ޑރ ޝަހީމް ޢަލީ ސަޢީދު ގޮވާލައްވައިފިއެވެ.
އެމަނިކުފާނު މިފަދައިން ވިދާޅުވީ ފާއިތުވި ތިން ދުވަހުގެ ތެރޭގައި ނުރައްކާތެރި ގިނަ އެކްސިޑެންޓްތަކެއް ހިނގައި އެ އެކްސިޑެންތަކުގައި 2 ޒުވާނަކު ނިޔާވުމާއި ގުޅިގެން ކަންބޮޑުވުން ފާޅުކުރައްވައި އެކްސްގައި ކުރެއްވި ޕޯސްޓެއްގައެވެ.
އެމަނިކުފާނުގެ ޕޯސްޓްގައި ވަނީ، ފުރާނައަކީ ވަރަށް އަގުހުރި އެއްޗެއްކަމަށާއި ޓްރެފިކަށް ހެދިފައި ހުރި ޤަވާއިދުތަކަށް ބޯލަނބައި ތަބަޢަވުމަށް އިލްތިމާސްކުރައްވައިފައެވެ.
https://x.com/Mohamedshaheem1/status/1832607147257163908
މީގެ އިތުރުން އެކްސިޑެންޓް ތަކުގައި ޒުވާނުން މަރުވަމުންދާކަމީ ހިތާމަވެރިކަމެއްކަން ފާހަގަކުރައްވައި މިނިސްޓަރ ވަނީ، އެކަންކަމަކީ ނިޔާވާ ފަރާތްތަކުގެ އާއިލާއަސް ލިބޭ ވަރަށް ބޮޑު ގެއްލުމެއް ކަމުގައި ވިދާޅުވެފައެވެ.
އެކްސިޑެންޓް ތަކުގައި ޒުވާނުން މަރުވަމުންދާކަމީ ހިތާމަވެރިކަމެއް. މައިންބަފައިންނާއި އާއިލާއަށް ލިބޭ ހިތާމައެއް. މިކަމާ ޒުވާނުން ވިސްނަންވާނެ. ގުނަވަންތަކަކީ ނިއުމަތެއް- މިނިސްޓަރ ޝަހީމް
ފާއިތުވި ތިންދުވަހުގެ ތެރޭގައި މާލެ ސަރަހައްދުގައި ވަނީ ނުރައްކާތެރި ގިނަ އެކްސިޑެންޓްތަކެއް ހިނގައިފައެވެ.
އޭގެ ތެރެއިން ބުދަ ދުވަހުގެ ރޭ ހުޅުމާލޭ ސެންޓަރލް ޕާކް ކައިރިން ބާރު ސްޕީޑްގައި ދުއްވާފައި ދިޔަ ރޭސްކާރެއް ސައިކަލެއްގައި ޖެހި ހިނގި އެކްސިޑެންޓްގައި 23 އަހަރުގެ ޒުވާނަކު ވަނީ ނިޔާވެފައެވެ.
އަދި ބުރާސްފަތި ދުވަހުގެ ރޭ މާލޭ ފަތާ ޓްރެކް ސަރަހައްދުގައި ކާރަކާއި ސައިކަލެއް ޖެހި ހިނގި އެކްސިޑެންޓަގައި އަނިޔާވި 21 އަހަރުގެ ޒުވާނަކަށް އައިޖީއެމްއެޗް ވެންޓިލޭޓަރުގައި ފަރުވާދެމުން އަންނަނިކޮށް ރޭ ވަނީ ނިޔާވެފައެވެ.
މި އަހަރުގެ މިހާތަނަށް 1907 ޓްރެފިކް އެކްސިޑެންޓް ފުލުހަށް ރިޕޯޓުކޮށްފައިވާއިރު، އެއީ މިދިޔަ އަހަރުގެ އެ މުއްދަތާ އަޅައިބަލާއިރު 431 އެކްސިޑެންޓްގެ އިތުރުވުމެއް ކަމަށް ތަފާސްހިސާބުތަކުން ދައްކައެވެ.
