ކުޑަކުއްޖަކަށް ޖިންސީ ގޯނާ ކުރިކަމަށް ސާބިތުވި މީހެއްގެ މައްޗަށް 12 އަހަރު ދުވަހުގެ ޖަލު ހުކުމެއް ކްރިމިނަލް ކޯޓުން އިއްވައިފިއެވެ.
އެކޯޓުން 12 އަހަރުގެ ޖަލު ހުކުމެއް ކޮށްފައިވަނީ ރ. މާކުރަތު، އިމޭޖު، މުޙައްމަދު ދާއޫދުގެ މައްޗަށެވެ.
އެކޯޓުން ބުނީ، ކުޑަކުދީންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ 3 ވަނަ މާއްދާގެ (ނ) ގެ ދަށުން ދައުލަތުން އޭނާއާއި ދެކޮޅަށް އުފުލި ދައުވާ ދާއޫދުގެ މައްޗަށް ސާބިތުވެފައިވާކަމަށެވެ.
ކުޑަކުއްޖަކަށް ޖިންސީ އަނިޔާ ކުރުމުގެ އިތުރުން އޭނާގެ މައްޗަށް ވަނީ، ފޯނުގައި އޮރިޔާން މަންޒަރު ހިމެނޭ ފޮޓޯއާ ވީޑިއޯ ގެންގުޅުނުކަމުގެ ދައުވާ ވެސް ސާބިތުވެފައެވެ. އެހެން ނަަމަވެސް އެ ސައުވާއާއި ގުޅިގެން ދާއޫދަށް ކުރި ހުކުމުގެ ތަފްސީލެއް އެ ކޯޓުން ހާމަކޮށްފައެއް ނުވެއެވެ.
ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލުތަކުން އަމަލު ކުރުމުގެ ގާނޫނުގައިވާ ގޮތުން މީހަކު، ކުޑަކުއްޖެއްގެ ހަށިގަނޑުގައި، ޖިންސީ ނިޔަތެއްއޮވެގެން ޖިންސީ ގުނަވަނެއްގައި ގަސްތުގައި އަތްލައިފިކަމަށްވާނަމަ، އެއީ ކުޑަކުއްޖަކާއެކު ޖިންސީ އަމަލެއް ހިންގުން ކަމުގައި ބެލެވޭނެއެވެ.
އެ ގާނޫނުގައިވާ ގޮތުން އެ ކުށް ސާާބިތުވެއްޖެ މީހެއްގެ އަދަބަކީ 10 އަހަރާއި 14 އަހަރާ ދެމެދުގެ މުއްދަތަކަށް ޖަލަށްލުމެވެ.
