ޑޮލަރު ވިއްކާކަމަށް ބުނެ ސްކޭމްތަކެއް އާންމުންދާތީ އެކަމާއިމެދު ސަމާލުވުމަށް މޯލްޑިވްސް ޕޮލިސް ސަރވިސްއިން އިލްތިމާސްކޮށްފިއެވެ.
އެ އިދާރާއިން އެކްސްގައި ކުރި ޕޯސްޓެއްގައި ވަނީ، މީސް މީޑިޔާގެ ތެރޭގައި މިފަދަ މުޢަމަލާތްތައް ކުރުމަަށްކަމަށްބުނެ ހިންގާ ސްކޭމްތައް އިތުރުވެފައިވާކަމަށެވެ.
އެގޮތުން މިފަދަ ސްކޭމްތަކުން ސަލާމަތްވުމަށް ބޭރު ފައިސާ ގަނެވިއްކުމުގެ މުއާމަލާތްތައް އިތުބާރުހުރި، އަދި އެފަދަ މުޢާމަލާތްތައް ކުރުމުގެ ޤާނޫނީ ހުއްދަ ލިބިފައިވާ ފަރާތެއް މެދުވެރިކޮށް ކުރުމަށް ފުލުހުން ވަނީ އިލްތިމާސްކޮށްފައެވެ.
ރާއްޖެއަށް ދިމާވެފައިވާ ޑޮލަރުގެ ތާށިކަމުގެ ސަބަބުން ކަޅު ބާޒާރުގައި ޑޮލަރު ވިއްކުމުގެ މައްސަލައަކީ ކަންބޮޑުވާ މިންވަރަކަށް އޮތް މައްސަލައެކެވެ.
އެގޮތުން ޓެލެގްރާމް، ފޭސްބުކް އަދި ވައިބަރ ފަދަ އޮންލައިން ޕްލެޓްފޯމްތަކުގައި މިފަދަ ސްކޭމްތައް ހިންގާ މިންވަރު ވަނީ ފާހަގަކުރެވޭ ވަރަށް އިތުރުވެފައެވެ.
މި ފަހުން ކަޅު ބާޒާރުގައި ޑޮލަރު ވިއްކާ ރޭޓް އިންތިހާއަށް މަތިވެގެން ގޮސް އެ އަދަދު ވަނީ 21ރ ށް ވެސް އަރައިފައެވެ.
ފުލުހުން ވިދާޅުވާ ގޮތުގައި، ކަޅު ބާޒާރުގައި ޑޮލަރު ވިއްކުމުގައި ގިނައިން ހަރަކާތްތެރިވަނީ ގަވާއިދާ ޚިލާފަށް ރާއްޖޭގައި އުޅޭ ބިދޭސީންނެވެ.
