ސަރުކާރުން އައްޔަންކުރާ ސިޔާސީ މަޤާމުތަކުގެ ތެރޭގައި ހިމެނޭ މިނިސްޓްރީތަކުގެ ސްޓޭޓުންގެ ތެރެއިން އަނެއްކާވެސް ސްޓޭޓް މިނިސްޓަރަކު މަޤާމުން ވަކިކޮށްފިއެވެ.
މި ފަހަރު މަޤާމުން ވަކިކޮށްފައި މިވަނީ، މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ސްޓޭޓް މިނިސްޓަރުގެ މަޤާމުގައި ހުންނެވި ޔޫސުފް އަބްދުލްގަފޫރެވެ.
ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، ގާނޫނުއަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން މިދިޔަ ބުރާސްފަތި ދުވަހު، ޔޫސުފް އަބްދުލްގަފޫރު ހޯމް މިނިސްޓްރީގެ ސްޓޭޓް މިނިސްޓަރުކަމުން ވަކިކޮށްފައިވާކަމަށެވެ. އެހެން ނަމަވެސް އޭނާ މަޤާމުން ވަކިކުރި ސީދާ ސަބަބެއް ހާމަކޮށްފައެއް ނުވެއެވެ.
ޔޫސުފް އަބްދުލްގަފޫރުހިމެނޭހެން މީގެ ކުރިން ހޯމް މިނިސްޓްރީގައި 6 ސްޓޭޓް މިނިސްޓަރަކު ތިއްބަވައެވެ. ޔޫސުފް ވަކިކުރެއްވުމުން އެ އަދަދު 5ށް ތިރިވެގެންދާނެއެވެ.
މާލީ ދަތިތަކުން އަރައިގަންނަން ސަރުކާރުގެ ސިޔާސީ މުވައްޒަފުންގެ އަދަދު މަދުކުރައްވާނެ ކަމަށް ރައީސް ޑރ. މުޙައްމަދު މުއިއްޒު ވަނީ މި ފަހުން ވިދާޅުވެފައެވެ.
ރައީސް ޑރ މުހައްމަދު މުޢިއްޒު ރައީސްކަމަށް އިންތިޚާބު ވެވަޑައިގެން ހުވާކުރެއްވުމާއި ދެމެދު ދިޔަ އިންތިޤާލީ މަރުޙަލާގައި މި ސަރުކާރުގެ ސިޔާސީ މުވައްޒަފުންގެ އަދަދު 700ށް ވުރެ އިތުރު ނުކުރައްވާނެކަމުގައި ވިދާޅުވިއެވެ.
މިހާރުގެ ސަރުކާރުން ވެރިކަމާއި ރަސްމީކޮށް ހަވާލުވީފަހުން މިހާތަނަށް ސަރުކާރުގެ ސިޔާސީ މުވައްޒަފުންގެ އަދަދު ހާމަނުވި ނަމަވެސް ސިޔާސީ މުވައްޒަފުންގެ އަދަދު 2،000ށްވުރެ މަތިވާނެ ކަމަށް އިދިކޮޅު ފަރާތްތަކުން ތުހުމަތުކުރެއެވެ.
