ބިންވެރިޔާ ސްކީމުގެ ދަށުން ހުޅުމާލެ ދެވަނަ ފިޔަވަހިން ދޫކޮށްފައިވާ ހުސް ގޯތިތަކުގައި ކާރު ރަޖިސްޓަރީ ކުރެވޭނެ ކަމަށް ހައުސިން ޑިވެލޮޕްމެންޓް ކޯޕަރޭޝަނުން ބުނެފިއެވެ.
އެޗްޑީސީ އިން މިއަދު އާންމުކޮށްފައިވާ “ހުޅުމާލެ ދެވަނަ ފިޔަވަހީގައި ޕްލޭނިން އަދި އިމާރާތް ކުރުމުގެ އުސޫލު” ގައި ބަޔާންކޮށްފައިވާ ގޮތުގައި ދިރިއުޅުމަށް ދޫކޮށްފައިވާ ގޯތިތަކުގެ ތެރެއިން އިމާރާތް ނުކޮށް އޮންނަ ހުސް ބިމުގައި ކާރެއް ރަޖިސްޓަރީ ކުރަން އެދޭ ނަމަ އެ ފުރުސަތު ލިބޭނެ ކަމަށާއި އެފަދަ ގޮތަކަށް ހުސް ބިމަށް ރަޖިސްޓަރީ ކުރެވޭނީ އެއް ކާރު ކަމަށެވެ.
އެހެންނަމަވެސް މިފަދައިން ރަޖިސްޓަރީ ކުރެވޭނީ ގޯތީގެ ވެރިފަރާތާ ނުވަތަ ވެރިފަރާތާ އާއިލީ ގޮތުން ގުޅުން އޮންނަ މީހެއްގެ ކާރެއް ކަމަށާއި ރަޖިސްޓަރީ ކުރަން ހުށަހަޅާ މީހަކީ ވެރިފަރާތް ނޫން ނަމަ ވެރިފަރާތާ އާއިލީ ގޮތުން ގުޅުން އޮންނަ މީހެއް ކަން ސާބިތު ކޮށްދިނުމަށް ލިޔުން ހުށަހަޅަން ޖެހޭނެ ކަމަށް މިއުސޫލުގައި ވަނީ ކަނޑައަޅާފައެވެ.
މީގެއިތުރުން އުސޫލުގައި ބަޔާންކޮށްފައިވާ ގޮތުގައި އެ ހުސްބިމެއްގައި ގޯތި އިމާރާތް ކުރުމަށް ކުރެހުން ފާސްކުރަން ހުށަހަޅާއިރު، ރަޖިސްޓަރީ ކުރުމަށް ހުއްދަ ނެގި ކާރު ވެސް އެ ކުރެހުމާއެކު ދައްކަން ޖެހޭނެއެވެ.
