އއ އުކުޅަހުގައި ސައިކަލަށް 4 މީހުން އަރުވައިގެން ސައިކަލު ދުއްވި މީހަކު ހައްޔަރުކޮށްފިއެވެ.
ފުލުހުން ވިދާޅުވީ، އޭނާ ހައްޔަރުކޮށްފައިވަނީ މި މަހުގެ 8 ވަނަ ދުވަހު ހަވީރު އެ ރަށު ބަނދަރުމަތިން 4 މީހުން ސައިކަލަށް އަރުވައިގެން ބާރު ސްޕީޑްގައި ދަނިކޮށް މަޑުކުރަން ބުނުމުން މަޑު ނުކޮށް ފުލުހުންގެ އަމުރައް ނުކިޔަމަންތެރިވުމާއި ގުޅިގެން ކަމަށެވެ.
މީގެ އިތުރުން އޭނާ ހަޑިހުތުރު ބަހުން ހަޅޭއްލަވައި އަޑުގަދަކޮށް އެ ސަރަހައްދުގެ އާންމު މަސްލަހަތު ނަގާލައިފައިވާކަމުގައިވެސް ފުލުހުން ވިދާޅުވިއެވެ.
މި މައްސަލައާ ގުޅިގެން، އިއްޔެ ކޯޓު އަމުރެއްގެ ދަށުން ހައްްޔަރުކޮށްފައި ވަނީ އެރަށު ޑޭޒީމާގެ، އަޙްމަދު ނަސީމު (29އ) އެވެ.
އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހަތް ދުވަހަށް ބަނދުކުރުމަށް އަމުރުކޮށްފައިވާ ކަމަށްވެސް ވިދާޅުވިއެވެ.
މި މައްސަލަ ފުލުހުން ތަހުގީގު ކުރަމުންދާ ކަމަށް ފުލުހުން ވިދާޅުވިއެވެ.
