ޖަޕާނު ކުންފުންޏަކާއި ގުޅިގެން ހއ. ދިއްދޫގައި ލޮނު އުފައްދާ ފެކްޓްރީއެއް އެޅުމުގެ މަސައްކަތް ފަށައިފިއެވެ.
ދިވެހި ކުންފުންޏަކާއި ޖަޕާނުގެ ކުންފުންޏަކާއި ގުޅިގެން ދިއްދޫގައި ލޮނު ފެކްޓްރީއެއް އެޅުމުގެ މަސައްކަތް ކުރަމުންދާ ކަމަށް ދިއްދޫ ކައުންސިލް މެންބަރު އަބްދުﷲ ވަހީދު ވިދާޅުވި އެވެ.
އަބްދުﷲ ވަހީދު ހާމަކުރެއްވި ގޮތުގައި ލޮނު އުފެއްދޭ ވަރަށް ރާއްޖޭގެ ކަނޑުގެ ލޮނުގަނޑު ރަނގަޅު ކަމަށް އެކުންފުނިތަކުން ވަނީ ބުނެފައެވެ. މިއާއިއެކު ހުރިހާ ޓެސްޓްތަކެއް ހެދުމަށް ފަހު ފެކްޓްރީގެ މަސައްކަތް ފަށާފައިވާއިރު، މިމަސައްކަތް ކާމިޔާބުވާނޭ ކަމުގެ ޔަގީން އެކުންފުނިތަކުން ދެއްވާފައިވާކަމަށް ވަހީދު ވިދާޅުވި އެވެ.
“އެ ޕްރޮޖްކެޓް ދިއްދޫގައި ގާއިމްވުމުން ރަށަށް ގިނަގުނަ ފައިދާތަކެއްވާނެ ކަމުގެ އުންމީދު އެ ފަރާތްތަކުން ވަނީ ދީފައި. އެގޮތުން ރަށުގެ ޒުވާނުންނަށް ވަޒީފާގެ ފުރުސަތު ލިބޭނެ ކަމަށް. އަދި ލޮނުގެ ވިޔަފާރި ރާއްޖޭގައި ވަރަށް ހިނގާނެ ކަމަށް.” އަބްދުﷲ ވަހީދު ވިދާޅުވިއެވެ.
ވަހީދު ވިދާޅުވެފައިވާ ގޮތުގައި ލޮނު ފެކްޓްރީގެ މަސައްކަތަށް ދިއްދޫއިން 35 އަހަރުގެ ދިގު މުއްދަތަށް ބޮޑު ބިމެއް ކުއްޔަށް ދޫކޮށްފައިވާ ކަމަށާއި މި ޕްރޮޖެކްޓް ފުރިހަމަވެގެން ދިއުމުން ދިއްދޫގެ ގިނަ ރައްޔިތުންތަކެއްގެ ހުވަފެންތަކުގައި ކުލަ ޖެހިގެންދާނެ އެވެ.
