ރަސްމީ ދަތުރުފުޅެއްގައި ރައީސް ޑރ. މުހައްމަދު މުއިއްޒު އިންޑިއާއަށް ވަޑައިގަންނަވާނެ ކަމަށް ރައީސް އޮފީހުން ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ އިސް ތަރުޖަމާނު ހީނާ ވަލީދު ވިދާޅުވީ، ރައީސް އިންޑިއާ އަށް ވަރަށް އަވަހަށް ވަޑައިގަންނަވާނެ ކަމަށާއި، އެ ދަތުރުފުޅަށް ރަނގަޅު ތާރީހަކާ މެދު މަޝްވަރާކުރެވެމުންދާ ކަމަށެވެ.
މިދަތުރުފުޅާއި ބެހޭ އިތުރު ތަފްސީލު ހީނާ ހާމަކުރައްވާފައެއް ނުވެއެވެ.
ރައީސް ޑރ. މުޢިއްޒު އެންމެ ފަހުން އިންޑިއާއަށް ވަޑައިގެންނެވީ އެ ގައުމުގެ ބޮޑުވަޒީރު ނަރެންދުރާ މޯދީ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް މިދިޔަ ޖޫން މަހުގެ ނުވަވަނަ ދުވަހުގައެވެ. އެއީ އެމަނިކުފާނު މަގާމާއި ހަވާލުވެވަޑައިގެންނެވި ފަހުން އިންޑިއާ އަށް ކުރެއްވި ފުރަތަމަ ރަސްމީ ދަތުރުފުޅެވެ.
އެމަނިކުފާނު ވެރިކަމަށް ވަޑައިގަތުމަށްފަހު އިންޑިއާ ސިފައިން ރާއްޖެއިން ބޭލުވުމުގެ ސަބަބުން އިންޑިއާ އާއި އެއްކޮށް އޮތް ގުޅުން ވަނީ ވަރަށް ބޮޑަށް ހީނަރުވެފައެވެ. ނަމަވެސް ރައީސް ޑރ. މުޢިއްޒު އިންޑިއާއާށް ކުރެއްވި ދަތުރަށްފަހު، ދެގައުމުގެ ގުޅުން ވަނީ އަލުން ބަދަހިވާން ފަށައިފި އެވެ.
