މޫސުމާބެހޭ ގައުމީ އިދާރާ (މެޓް)ގެ އޮފީސްތައް ތަރައްގީކޮށް، ނ. މާފަރުގައި މުޅިން އަލަށް މެޓް އޮފީހެއް އެޅުމަށް އެންވަޔަމެންޓް މިނިސްޓްރީން މިއަދު އެއްބަސްވުމެއްގައި ސޮއިކޮށްފިއެވެ.
އދ.ގެ އެންވަޔަމަންޓް ޕްރޮގްރާމު މެދުވެރިވެގެން ސިސްޓަމެޓިކް އޮބްޒަވޭޝަން ފައިނޭންސިން ފެސިލިޓީ (އެސްއޯއެފްއެފް)އާއެކު ވެފައިވާ މިއެއްބަސްވުމުގެ ދަށުން މެޓް އޮފީހުގެ ވެދަރ އޮބްޒަވޭޝަން ނެޓްވޯކު، އަޕްގްރޭޑު ކުރެވިގެންދާނެކަމަށް އެންވަޔަމަންޓް މިސްޓަރު ތޯރިޤު އިބްރާހީމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވިއެވެ.
އެގޮތުން ހުޅުލެ، ހދ. ހަނދިމާދޫ، ގދ. ކައްދޫ އަދި އައްޑޫ ސިޓީ ގަން އެއާޕޯޓުގައި ހުރި މެޓް އޮފީހުގެ ވަސީލަތްތައް އަޕްގްރޭޑް ކުރެވޭނެ ކަމަށް ވެސް މިނިސްޓަރު ތޯރިޤު ވިދާޅުވިއެވެ.
މީގެއިތުރުން، ނ. މާފަރު އެއާޕޯޓުގައި ފުރިހަމަ ވަސީލަތްތަކާއެކު މެޓުގެ އޮފީހެއް އެޅުމަށް ހަމަޖެހިފައިވާ ކަން ފާހަގަކުރައްވާ މިނިސްޓަރު ވިދާޅުވީ ރާއްޖެއަކީ ވަސީލަތްތައް މަދު ގައުމަކަށްވުމުން، ގުދުރަތީ ބޮޑެތި ކާރިސާތައް ދިމާވާ ދަނޑިވަޅުތަކުގައި، އެ ދަތިތަކުން އަރައިގަތުމަށް ބޮޑެތި ގޮންޖެހުންތަކެއް ހުރިކަން މެޓުން މީގެ ކުރިން ފާހަގަކޮށްފައިވާ ކަމަށެވެ.
