މަތީ ސާނަވީ އިމްތިޙާނުތަކުން އެންމެ މަތީ ނަތީޖާ ހޯދި ދަރިވަރުންގެ އަގު ވަޒަންކޮށް އިނާމު ދިނުމަށް މިއަދު ކުރިއަށްދިޔަ 2022 – 2023 ވަނަ އަހަރުގެ “މަތީ އަރުތަވެރިންގެ އިނާމު” ދިނުމުގެ ރަސްމިއްޔާތުގެ ހުރިހާ ދަންފަޅިއެއް ރައީސް ޑރ. މުޙައްމަދު މުޢިއްޒު ޝަރަފުވެރި ކޮށްދެއްވަވައިފިއެވެ.
ތިން ދަންފަޅިއަކަށް ބަހާލައިގެން ބޭއްވި މިރަސްމިއްޔާތުގެ ހެނދުނު، މެންދުރުފަސް އަދި ރޭގަނޑުގެ ރަސްމިއްޔާތުގައި ރައީސް ބައިވެރިވެފައިވާއިރު، މިއީ ދިވެހިރާއްޖޭގެ ރައީސުލްޖުމްހޫރިއްޔާ މިރަސްމިއްޔާތު ތިން ދަންފަޅި ޝަރަފްވެރިކޮށްދެވި ފުރަތަމަ ފަހަރެވެ.
މި ރަސްމިޔާތުގެ ތިންވަނަ ދަންފަޅީގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވެސް ވަނީ ބައިވެރިވެވަޑައިގެންނެވި އެވެ.
މިރަސްމިއްޔާތުގައި ރައީސް ޑރ. މުޢިއްޒު ވަނީ މަތީ ޘާނަވީ ތަޢުލީމު ނިންމާ އިމްތިހާނުތަކުން މުޅި ދުނިޔެއިން 1 ވަނަ އަދި ޤައުމީ ގަދަ 10ގެ 1 ވަނަ ނަތީޖާ ހޯދި ދަރިވަރުންނަށް ޓްރޮފީ އާއި ހަނދާނީ ލިޔުން ހަވާލުކޮށްދެއްވާފައެވެ.
ރައީސް އޮފީހުން ހާމަކޮށްފައިވާ ގޮތުގައި މިފަހަރު އިނާމު ލިބޭ 441 ދަރިވަރުންނަށް ޤައުމީ ފެންވަރުގައި ޝަރަފްދިނުމަށް މިއަދު ހެނދުނުން ފެށިގެން މިރެއާ ހަމަޔަށް ކުރިއަށްގެންދިޔަ ރަސްމިއްޔާތުތަކުގައި އެމަނިކުފާނު ބައިވެރިވެވަޑައިގަތުމަކީ ތަޢުލީމާއި ޒުވާން ދަރިވަރުންގެ ކުރިއެރުމަށް އެމަނިކުފާނު ދެއްވާ އަހައަމިއްޔަތުކަން ދައްކުވައިދޭ ކަމެކެވެ.
މީގެ ކުރީގެ އަހަރުތަކުގައި ސަރުކާރުގެ ނުވަތަ އަމިއްލަ ބޮޑެތި ކުންފުނިތަކުން ސްޕޮންސަރކޮށްގެން، ސްޕޮންސަރުންގެ އަތުން އިނާމު ހޯދައިގެން މިހަފްލާ ބާއްވަމުން އައިސްފައިވާއިރު، ރައީސް ޑރ. މުޢިއްޒު ވަނީ މިކަމަކީ ސީދާ ދައުލަތުގެ ބަޖެޓުން ހޭދަކޮށްގެން ވަރަށް ރަނގަޅު ފެންވަރުގައި ކުރިއަށްދާ ރަސްމިއްޔާތެއްގެ ގޮތުގައި ހެދުމަށް ހަމަޖައްސައިފައި ކަމަށް ވެސް ރައީސް އޮފީހުން ވިދާޅުވި އެވެ.
މީގެއިތުރުން ދަރިވަރުންނަށް އެކުދިން ބޭނުންވާނޭ ފަދަ ރަނގަޅު ފެންވަރުގެ އިނާމުދިނުމަށް ރައީސް އިރުޝާދުދެއްވާފައިވާ ކަމަށް ވެސް ރައީސް އޮފީހުން ވިދާޅުވި އެވެ.
