ކުޅުދުއްފުށި ސިޓީ ފަޅު ތެރޭގައި މަރުވެފައި އޮއްވާ މި މަހުގެ 11 ވަނަ ދުވަހު ފެނުނު މީހާގެ ހަށިގަނޑުގެ ޕޯސްޓް މޯޓަމް ހެދުމަށް ފޮނުވުމުގެ މަސައްކަތް ކުރަމުން އަންނަކަމުގައި ފުލުހުން ބުނެފިއެވެ.
އެގޮތުން މިދިޔަ ބުދަ ދުވަހު އެ ސިޓީފގެ ފަޅުތެރެއިން މަރުވެފައި އޮއްވައި ފެނުނު މީހާގެ ހަށިގަނޑު މިހާރު މާލެ ގެނެވިފައިވާކަމަށް ފުލުހުން ބުނެއެވެ.
އޭނާގެ ހަށިގަނޑުގެ ބޭރުފުށުން އަނިޔާގެ އެއްވެސް ނިޝާނެއް ފެންނަން ނެތް ކަމަށާއި އެހެން ނަމަވެސް އޭނާ މަރުވުމަށް މެދުވެރި ސަބަބު މިހާތަނަށް އަދި ދެނެގަނެވިފައި ނުވާކަމަށް ފުލުހުން ބުނެއެވެ.
ފުލުހުންގެ މީޑިއާ އޮފިޝަލް ވިދާޅުވީ އެ މީހާގެ ހަށިގަނޑު ޕޯސްޓްމޯޓަމް ހެދުމަށްޓަކައި ރާއްޖެއިން ބޭރަށް ފޮނުވުމުގެ މަސައްކަތް ކުރަމުންދާ ކަމަށެވެ.
މަރުވެފައި އޮއްވައި ފެނުނީ، އެ ސިޓީގެ ޑެއިޒީފެހި، އުމުރުން 36 އަހަރުގެ މުޙައްމަދު ހަސަނެވެ.
