މުދަލު ޒަކާތުގެ ގޮތުގައި ދައުލަތަށް ޖުލައި މަހު 73.8 މިލިއަން ރުފިޔާ ލިބިފައިވާ ކަމަށް މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބުތަކުން ދައްކައިފިއެވެ.
މީރާއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މިދިޔަ ޖުލައި މަހުގެ ނިޔަލަށް މުދަލު ޒަކާތުގެ ގޮތުގައި ދައުލަތަށް 73.8 މިލިއަން ރުފިޔާ ލިބިފައިވާއިރު، މިއީ ހުސްވި އަހަރާއި އަޅާބަލާއިރު، 9.8 އިންސައްތަ ކުރިއެރުމެކެވެ. މިދިޔަ އަހަރުގެ އޮގަސްޓު މަހުގެ ނިޔަލަށް މުދަލު ޒަކާތުގެ ގޮތުގައި ލިބިފައި ވަނީ 73.8 މިލިއަން ރުފިޔާ އެވެ.
މުދަލު ޒަކާތުގެ ގޮތުގައި ލިބޭ އަދަދު މިއަހަރު އެންމެ މަތިވެފައި ވަނީ ޖުލައި މަހުގައެވެ. ޖުލައި މަހު މީރާއަށް މުދަލު ޒަކާތުގެ ގޮތުގައި 5 މިލިއަން ރުފިޔާ ލިބިފައިވާކަން މީރާއިން އާންމުކޮށްފައިވާ ތަފާސް ހިސާބުތަކުން ދައްކައެވެ.
މުދަލު ޒަކާތް ދައްކަން ޖެހޭނީ އެމީހެއްގެ މުދަލުގެ ނިޞާބު ހަމަވާތާ އަހަރެއް ފުރިފައިވާ ކޮންމެ މީހެކެވެ. އަހަރުގެ ކޮންމެ ދުވަސްވަރެއްގައި ވެސް މުދަލު ޒަކާތް ދެއްކޭއިރު، އެންމެ ފަހުން މުދަލު ޒަކާތުގެ ނިޞާބަށް ބަދަލު ގެނެސްފައި ވަނީ މިދިޔަ މަހު އެވެ. މިހާރު މުދަލު ޒަކާތުގެ ނިސާބުގެ ގޮތުގައި ކަނޑައަޅާފައިވާ މިންވަރަކީ 9،353.4 ރުފިޔާއެވެ.
